Sumqayıtda nənə iki yaşlı nəvəsinə işgəncə verdi - YENİLƏNİB

Əmək və Əhalinin Sosial Müdafiəsi Nazirliyinin (ƏƏSMN) tabeliyindəki Sosial Xidmətlər Agentliyi Sumqayıtda nənəsi tərəfindən körpənin döyülməsi ilə bağlı daha bir açıqlama verib.

Agentliyin İctimaiyyətlə Əlaqələr Şöbəsinin müdiri Murad Həşimov Oxu.Az-ın sorğusuna cavab olaraq bildirib ki, sözügedən məsələ qurum tərəfindən nəzarətə götürülüb:

"Kəmalə Ağazadə tərəfindən müvafiq altsistemə bu gün edilən müraciət də qeydə alınıb. Uşağın aidiyyəti dövlət uşaq müəssisəsinə yerləşdirilməsi məsələsinə qiymətləndirilmə aparılaraq baxılacaq".

O əlavə edib ki, nənənin himayəsində qalan digər iki uşaq barədə də Agentlik əməkdaşları yerində qiymətləndirmə aparacaqlar.

11:36

Daxili İşlər Nazirliyi Sumqayıtda nənəsi tərəfindən körpənin döyülməsi ilə bağlı yayılan görüntülərə münasibət bildirib.

DİN-in Mətbuat Xidmətinin əməkdaşı, polis mayoru Anar Qafarov Oxu.Az-a bildirib ki, sosial şəbəkələrdə Sumqayıt şəhərində azyaşlının qeyri-insani rəftara məruz qalması ilə bağlı yayılan informasiyalar qurum tərəfindən nəzarətə götürülüb:

"Belə ki, Sumqayıt şəhəri ərazisində yaşayan Ülviyyə Rəsul qızı Abdullayevanın himayəsindəki üç uşağı baxımsız şəraitdə saxlaması barədə Sumqayıt Şəhər Polis İdarəsinə məlumat daxil olub. Polis əməkdaşları ünvana gedərək, Ü.Abdullayevanın himayəsində olan üç azyaşlıdan biri - 2021-ci il təvəllüdlünün bədənində müxtəlif xəsarətlər aşkar ediblər.

Körpə nənəsi ilə birlikdə Təcili Tibbi Yardım Şöbəsinə gətirilib. İlkin müayinə zamanı azyaşlının fiziki və psixoloji cəhətdən yaşıdlarından geri qaldığı və sağ qulağında xəsarətlər aşkar edilib. Azyaşlı tibbi yardım göstərilməsi və müvəqqəti olaraq qalması üçün polis əməkdaşları tərəfindən sığınacağa yerləşdirilib. Hazırda faktla bağlı Sumqayıt ŞPİ-nin Təhqiqat Şöbəsində araşdırma aparılır. Müvafiq ekspertizalar təyin edilib".

Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlu Oxu.Az-ın sorğusuna cavab olaraq bildirib ki, məsələ nəzarətə götürülüb:

"Artıq aidiyyəti qurumlar məlumatlandırılıblar, lazımi addımlar atılacaq".

Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin İctimaiyyətlə Əlaqələr Şöbəsinin müdiri Murad Həşimov Oxu.Az-ın sorğusuna cavab olaraq bildirib ki, məsələ ilə bağlı araşdırma apardıqdan sonra məlumat veriləcək.

11:14

Sumqayıtda körpə nənəsi tərəfindən döyülüb.

Bu barədə Azərbaycan Uşaqlar Birliyinin sədri Kəmalə Ağazadə sosial şəbəkə hesabında paylaşım edib.

O bildirib ki, uşağın iki yaşı var:

"Nənəsinin fiziki işgəncələrinə məruz qalıb. O, Daxili İşlər Nazirliyi Sumqayıt Şəhər Polis İdarəsinin əməkdaşları tərəfindən aşkarlanaraq sığınacağa yerləşdirilib. Körpə bir həftə xəstəxanada nəzarətdə qalıb".

K.Ağazadə dövlət qurumlarına müraciət edib:

"Ailə, Qadın və Uşaq Problemləri üzrə Dövlət Komitəsi, Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyi, həmin nənədə daha iki uşaq var. Uşaqların anası bir müddət öncə dünyasını dəyişib".

Telegramda izləyin