İran üçüncü hərbi təsvir peykini kosmosa göndərib

İran "Nur-3" adlı ölkənin üçüncü hərbi təsvir peykini kosmosa göndərib.

Sonxeber.az xəbər verir ki, İranın rabitə və informasiya texnologiyaları naziri İsa Zarepur sosial media hesabından paylaşdığı mesajda İnqilab Keşikçiləri Ordusu Aerokosmik Qüvvələri tərəfindən hazırlanmış hərbi görüntü peykinin "Kasid" (Messenger) adlı peyk daşıyıcı raketdən istifadə edilərək orbitə buraxıldığını bildirib.

Nazir bəyan edib ki, "Nur-3" adlı peykin yerdən 450 kilometr uzaqlıqdakı orbitə yerləşdirilməsi mərhələsi uğurla başa çatıb.

İlk yerli istehsal peykini 2009-cu ilin fevralında kosmosa göndərən İran 2020-ci ilin aprelində "Nur-1" adlı ilk hərbi peykini kosmosa çıxarıb. 2022-ci ilin martında İran "Nur-2"-ni 500 kilometr məsafədə orbitə yerləşdirdiyini elan edib.

İranın əvvəllər peyk yerləşdirmək cəhdlərindən bəziləri uğursuzluqla nəticələnib.

ABŞ və onun Qərb müttəfiqləri İranın ballistik raket fəaliyyətinin Birləşmiş Millətlər Təşkilatının Təhlükəsizlik Şurasının 2231 saylı qətnaməsinə zidd olduğunu və İranın peyk fəaliyyətinin arxasında Yaxın Şərq və Avropanı təhdid edən qitələrarası ballistik raket proqramını gizlətdiyini iddia edir.

Tehran administrasiyası isə istehsal edilən raketlərin şərti olduğunu və BMT Təhlükəsizlik Şurasının nüvə sazişini dəstəkləyən 2231 saylı qətnaməsinə uyğun olduğunu müdafiə edir.

Telegramda izləyin