Paşinyan Almaniya kansleri Olaf Şolsu Birlik Günü münasibətilə təbrik edib

Baş nazir Nikol Paşinyan Almaniya Federativ Respublikasının kansleri Olaf Şolsa milli bayram – Birlik Günü münasibətilə təbrik məktubu göndərib.

Sonxeber.az xəbər verir ki, bu barədə erməni mətbuatı məlumat yayıb.

"Sizi və Almaniya xalqını milli bayram – Birlik Günü münasibətilə ürəkdən təbrik edirəm.

33 il əvvəl baş vermiş bu əlamətdar hadisə alman xalqı ilə Avropanın birliyinin təsdiqinin simvoluna çevrildi.

Almaniya Ermənistanın etibarlı və sabit tərəfdaşlarından biridir, ölkəmizdə demokratik və iqtisadi islahatların, eləcə də Ermənistan-Avropa İttifaqı əməkdaşlığının genişləndirilməsinin fəal tərəfdarıdır.

Məmnunluq hissi ilə qeyd etməliyəm ki, cari ildə Ermənistan və Almaniya arasında dövlətlərarası münasibətlər xeyli intensivləşib, yüksək səviyyəli qarşılıqlı səfərlər həyata keçirilib.

Bu ilin yazında Almaniyaya işgüzar səfərim çərçivəsində keçirdiyimiz görüşü xatırlayıram, görüş zamanı siyasi, təhlükəsizlik, ticarət-iqtisadi, enerji, təhsil, mədəniyyət və ikitərəfli münasibətlərin digər sahələri üzrə konstruktiv müzakirələr apardıq.

Biz dövlətlərimiz arasında mövcud yüksək səviyyəli siyasi dialoqa böyük əhəmiyyət veririk və Almaniyanın regionumuzda sülhün və sabitliyin qorunması və möhkəmləndirilməsi prosesində göstərdiyi səyləri, habelə sülhün bərqərar olunmasına yönəlmiş beştərəfli danışıqlarda şəxsən iştirakınızı yüksək qiymətləndiririk.
Ümid edirəm ki, birgə səylərlə xalqlarımızın rifahı naminə ikitərəfli və çoxtərəfli əməkdaşlıq çərçivəsində yeni uğurlara imza atacağıq.

Bir daha sizi və Almaniya xalqını Birlik Günü münasibətilə təbrik edir, gələcək tərəqqi arzulayıram.

Sizi sizin üçün əlverişli vaxtda Ermənistana səfər etməyə ürəkdən dəvət edirəm",- deyə Paşinyan bildirib.

Telegramda izləyin