Xorvatiyanın müdafiə naziri ölümlə nəticələnən qəzaya görə istefaya göndərildi

Xorvatiyanın müdafiə naziri Mario Banojiç bir nəfərin öldüyü, məmurun özünün isə ağır yaralandığı qəzadan sonra vəzifəsindən istefaya göndərilib.

Nazirlər Kabinetinin Mətbuat Xidməti onun sözlərinə istinadən xəbər verir ki, müvafiq qərarı ölkənin Baş naziri Andrey Plenkoviç prokurorluğun qəzanın səbəblərini açıqlamasından sonra qəbul edib.

"Mən Mario Banojiçi müdafiə naziri vəzifəsindən istefaya göndərdim və onun vəzifələrini müvəqqəti icra etmək üçün Müdafiə Nazirliyinin dövlət katibi Zdravko Yakopu təyin etdim", - deyə baş nazir bildirib.

O, həmçinin mərhumun ailəsinə başsağlığı verib.
Hadisə barədə şənbə günü, noyabrın 11-də məlum olub. Xorvatiya polisinin məlumatına görə, səhər tezdən Vinkovitsa şəhərinin çıxışında nazirin idarə etdiyi avtomobil yük avtomobili ilə toqquşub, qəza nəticəsində bir nəfər ölüb, ikincisi isə xəstəxanaya yerləşdirilib. Məlumata görə, Mario Banojiç beyninin əzilməsi və bir sıra digər xəsarətlər alıb, Vinkovtsadaki xəstəxanaya yerləşdirilib, daha sonra Osiyek Klinik Xəstəxana Mərkəzinə köçürülüb.

Prokurorluğun məlumatına görə, nazir manevrin təhlükəsiz olduğuna əmin olmadan yük maşınını ötməyə başlayıb və nəticədə toqquşma baş verib. Vukovar rayon prokurorunun müavini Biyan Luburiçin verdiyi məlumata görə, hazırda hərəkətdə olan avtomobillərin sürəti müəyyən edilməyib və sürücülərin alkoqol üçün qan analizlərinin cavabları gözlənilir.

Telegramda izləyin