Ermənistan universitetdə partlayışla bağlı cinayət işi açıb

Ermənistan İstintaq Komitəsi Yerevan Dövlət Universitetinin Kimya fakültəsinin zirzəmisində baş vermiş partlayışla bağlı cinayət işi açıb.

Sonxeber.az xəbər verir ki, bu barədə erməni mətbuatı məlumat yayıb.

Hüquq-mühafizə orqanı açıqlamasında partlayış qurbanının 73 yaşında olduğunu bildirib. Onun meyiti partlayışın baş verdiyi zirzəmidə tapılıb.

Daha üç nəfər, o cümlədən bir polis əməkdaşı yaralanıb.

Polis məmuru tüstüdən zəhərlənərək xəstəxanaya yerləşdirilib. YSU-nun işçiləri kimi tanıdığı digər iki zərərçəkən, 70 və 66 yaşlılar isə yanıq xəsarətləri ilə xəstəxanada müalicə alırlar.

Faktla bağlı Cinayət Məcəlləsinin 355-ci maddəsinin 2-ci (tikintidə və ya digər işlərin aparılmasında təhlükəsizlik tələblərinin pozulmasına səbəb olan şəxsin ölümünə və ya ağır xəsarət almasına səbəb olduqda), habelə 357-ci (yanğın təhlükəsizliyi tələblərinin pozulmasına səbəb olduqda) 2-ci bəndi ilə cinayət işi başlanıb.

Telegramda izləyin