Ermənistan və Böyük Britaniya 2023-2024-cü illər üçün Müdafiə Əməkdaşlıq Planı imzalayıb

Londonda Ermənistan-Böyük Britaniya arasında 6-cı Strateji Müdafiə Məsləhətləşmələri keçirilib.

Sonxeber.az xəbər verir ki, iclasda iştirak edən Ermənistan nümayəndə heyətinə Müdafiə Nazirliyinin Müdafiə siyasəti və beynəlxalq əməkdaşlıq şöbəsinin rəisi Levon Ayvazyan başçılıq edib.

Məsləhətləşmələrdə Ermənistanın Böyük Britaniyadakı səfiri Varujan Nersesyan da iştirak edib.

2023-2024-cü illər üçün Ermənistan-Böyük Britaniya Müdafiə Əməkdaşlıq Planı imzalanıb. Planı Levon Ayvazyan və Böyük Britaniya Müdafiə Nazirliyinin Rusiya, Şərqi Avropa və Mərkəzi Asiya üzrə Siyasət direktoru Devid Morqan imzalayıb.

Regional və beynəlxalq təhlükəsizlik, o cümlədən müdafiə sahəsində ikitərəfli əməkdaşlıq məsələləri müzakirə edilib.

Ayvazyan Ermənistan ətrafında təhlükəsizlik vəziyyəti və erməni tərəfinin regional sülh və sabitliyə yönəlmiş addımlarını, o cümlədən "Sülh yollarının kəsişməsi" layihəsini təqdim edib. Ermənistan ordusunda həyata keçirilən əsas islahatlar da təqdim olunub.

Tərəflər ikitərəfli hərbi əməkdaşlığın hazırkı kursunu və inkişaf perspektivlərini hərtərəfli müzakirə ediblər.

Tərəfdaşlıq potensialı olan bir sıra yeni sahələrdə əməkdaşlıq ətrafında razılaşmalar əldə olunub.

Növbəti Ermənistan-Böyük Britaniya strateji müdafiə məsləhətləşmələrinin İrəvanda keçirilməsi barədə razılıq əldə olunub.

Telegramda izləyin