COVID-ə yoluxma YENİDƏN ARTIR – "Əvvəl bir həftəyə sağaltmaq olurdu, indi isə..."

Ötən ilin dekabrın 31-dən bu ilin yanvarın 18-nə qədər COVİD-19-a yoluxma 109 nəfər, ölüm sayı isə 12 nəfər artıb.

Belə ki, Nazirlər Kabineti yanında Operativ Qərargahın dekabrın 31-də yaydığı məlumatda göstərildi ki, 116 nəfər koronavirusa yoluxub, analiz nümunələri müsbət çıxan 2 nəfər isə vəfat edib, amma 102 nəfər müaıicə olunaraq sağalıb.

Yanvarın 18-də açıqlanan məlumatda isə yoluxma sayının 225 nəfərə çatdığı, ölənlərin sayının isə 14 nəfər olduğu vurğulandı. Göründüyü kimi, koronavirusa yoluxma statistikasından yenidən artım müşahidə olunur.

Yoluxmaların artmasına səbəb nədir?

Bizim.Media-nın mövzu ilə bağlı suallarını cavablandıran terapevt-həkim Abbas Bağırov, ölkədə korovirusun hələ də mövcud olduğunu bildirib və əhaliyə diqqətli olmağı tövsiyə edib.

Son vaxtlar yoluxma və ölüm hallarının getdikcə artdığını deyən müsahibimiz, koronavirusla yanaşı digər viruslara da yoluxma prosesinin başladığını diqqətə çatdırıb:

"Bir xəstənin həm koronavirusla, həm qrip virusu ilə, həm də qızılca ilə yoluxmasını müşahidə etdiyimiz "Tridemiya" prosesi yayılmaqdadır. Bu da ölüm faizlərinin artmasına səbəb olur".

Yayılma tendensiyasının hələ də davam edəcəyini söyləyən həkimin sözlərinə görə, ancaq vaksinlər və immun sistemini gücləndirən dərmanlar və vitaminlərlə xəstəliklərdən qorunmaq olar:

"Ümumdünya Səhiyyə Təşkilatı da bəyan etdi ki, sanitar-gigiyenik normalara ciddi riayət olunması ilə bərabər, vaksinasiya rejimini tənzimləməklə və orqanizmin müqavimətini artıran prepatların təyinatı ilə insanlar özlərini qoruya bilərlər. Artıq Azərbaycanda yeni vaksinasiya prosesi başlayıb. İlk növbədə insan özü-özünün həkimi olmalı və tələb olunan bütün profilaktik tədbirləri öz üzrəində tətbiq etməlidir ki, yoluxmasın, yoluxsa da, xəstəliyi yüngül keçirsin. Açıq havada çox gəzmək, sosial sıxlıq müşahidə olunan yerlərdən uzaq olmaq və istirahət rejiminə riayət etmək lazımdır. Risk qrupuna aid olan şəxslər isə xüsusilə diqqətli olmalıdırlar".

Həkimin bildirdiyinə görə, koronavirsunun mutasiyaya məruz qalmış və hələ də təyin olunmayan yeni subvahidi yayılmaqdadır:

"Yayılmaqda olan yeni virus ştammının molekulyar quruluşu tam xarakerizə olunmayıb, amma həm pandemik göstəriciləri yüksəkdir, həm də sağalma müddəti uzun çəkir. Bunu bizə müraciət edən pasiyentlərdə də müşahidə edirik. Əvvəllər xəstə qrip dərmanları ilə 1 həftəyə tam sağalırdı, amma indi 21 günə xəstəni sağaltmaqda çətinlik çəkirik.
Afrikada və Amerika qitəsində gedən proseslərə nəzər yetirdikdə, bunun yayılma tezliyini daha yüksək olduğunu görürük. Bu baxımdan da hələlik əvvəlki koronavirus kimi kritik həddə çatmasa da, çox təhlükəlidir. Həm pandemiyanın miqyasının genişlənməsi, həm də ölüm sayının artması onu göstərir ki, bu mutasiyadan ciddi şəkildə qorunmaq lazımdır. Əvvəlki kimi yenidən gigiyenik normativlərə riayət etmək, yaxın təmasdan qaçmaq lazımdır".

Telegramda izləyin