Ölən qohumlarını məzardan çıxarıb fotoşəkil çəkdirirlər

İndoneziyada Toracan tayfası ölən qohumlarını məzardan çıxarıb fotoşəkil çəkdirmək ənənəsini davam etdirir.

Sonxeber.az türk mediasına istinadən xəbər verir ki, Ma'nene adlanan bu ritualda ölən ailə üzvləri məzarlarından çıxarılır və onların yaşayan qohumları ilə fotoşəkillər çəkilir.

Bu ənənə bir neçə ildən bir, adətən avqustun sonunda baş verir. Ailələr ölmüş qohumlarının mumiyalanmış cəsədlərini çıxarır, təmizləyir və onlara yeni paltar geyindirir. Bəzən meyitlərə siqaret də verilir. Ritualın məqsədi əcdadların ruhları ilə əlaqəni saxlamaq və ailə bağlarını möhkəmləndirməkdir. Torajlılar bu ənənənin onlara şans və bolluq gətirəcəyinə inanırlar.

Toracan mədəniyyətində ölüm qəfil son deyil, uzun bir proses kimi qəbul edilir. Mərhum evdə saxlanılır və müvafiq dəfn mərasimi təşkil olunana qədər "xəstə" və ya "yuxuda" hesab olunur. Bu hazırlıq prosesi bəzən illər çəkə bilər.

Dəfn mərasimləri böyük və bahalı keçirilir. Mərasimdə camışlar qurban kəsilir və inanılır ki, nə qədər çox camış kəsilərsə, mərhumun axirətdə statusu bir o qədər yüksək olacaqdır.

Bu ənənə başqaları üçün qorxulu görünsə də, Toracan xalqı üçün bu, öz əcdadlarına hörmət və məhəbbətin ifadəsidir.

Telegramda izləyin

instagramda izləyin