"Everest"dən 100 il əvvəl yoxa çıxan alpinistin ayağı tapıldı

100 il əvvəl yoxa çıxan britaniyalı alpinistə aid olduğu düşünülən ayaq Everest dağında tapılıb. Bu kəşf alpinizmin ən böyük sirlərindən birini həll edə bilər.

Sonxeber.az xarici mediaya istinadən xəbər verir ki, Andrey Komin Irvin 1924-cü ilin iyununda ortağı Corc Mallori ilə birlikdə Everestə dırmaşmağa cəhd edib. Lakin onlar yoxa çıxıb. Mallorinin meyiti hadisədən bir müddət sonra tapılsa da, İrvinin cəsədi heç vaxt tapılmayıb.

Ancaq keçən ay National Geographic sənədli filmini çəkən alpinistlər qrupu əriyən buzlağın altında insan ayağı ilə rastlaşıb.

Komandaya rəhbərlik edən məşhur macəraçı Cimmi Çin kəşfi "böyük və emosional an" kimi qiymətləndirib.

İllər keçdikcə bəziləri İrvinin cəsədini axtarmağa çalışıblar. Lakin tapa bilməyiblər.

Britaniya səlahiyyətliləri DNT nümunəsi götürərək ayağın kimə aid olduğunu müəyyənləşdirməyə çalışırlar. Bununla belə, çəkiliş qrupu çəkmənin içərisindən tapılan corabın İrvinə məxsus olduğuna tam əmindir. Çünki corabın üzərində "AC Irvine" sözləri yazılıb.

İtdiyi zaman 22 yaşı olan İrvin bir əsrdir alpinizm dünyasını maraqlandıran ekspedisiyanın ən gənc üzvü idi.

İrvin və Mallori sonuncu dəfə 1924-cü il iyunun 8-də zirvəyə yola düşərkən sağ olaraq görülüblər.

Mallorinin cəsədi yalnız 1999-cu ildə amerikalı alpinist tərəfindən tapılıb.

Telegramda izləyin