Zooparkda alimləri təəccübləndirən sirli məxluq aşkarlanıb

İngiltərənin Bristol zooparkında peyda olan sirli məxluq hətta mütəxəssisləri də təəccübləndirib.

Sonxeber.az xarici mediaya istinadən xəbər verir ki, Bağın 200-dən çox heyvan növünə ev sahibliyi edən Ayı Meşəsi ərazisindəki gecə görüntü kamerasına əks olunan dördayaqlı canlının nə olduğu hələ müəyyən edilməyib.

Bristol Zooparkının İctimaiyyətlə Əlaqələr Müdiri Rosie Sims mövzu ilə bağlı verdiyi açıqlamada, "Şotlandiyada Loch Ness canavarı, Kornuollda Bodmin Moor canavarı var. Bəlkə də Bristolun öz əfsanəvi canlısını kəşf etdik" - dedi.

Görüntüləri araşdıran süni intellekt ChatGPT, sirli canlının "muntjac" adlanan və "hürən maral" olaraq da bilinən bir növ ola biləcəyini açıqladı. Bu heyvanların qısa ayaqları, yuvarlaq bədəni və arxaya dönük qulaqları olduğu bildirilib.

Ayı, canavar, vaşaq kimi heyvanların məskunlaşdığı ərazidə işləyən gözətçilər daha əvvəl belə bir canlıya rast gəlmədiklərini bildiriblər. Bir neçə dəfə kameralara düşən sirli məxluq bağ rəhbərliyini hərəkətə keçirməyə vadar edib.

Mütəxəssislər zooparklardakı gecəgörmə kameralarının gözlənilməz canlıların aşkar edilməsində mühüm rol oynadığını və bu cür kəşflərin biomüxtəlifliyin zənginliyini göstərdiyini vurğulayırlar.

Vüsalə İbrahimli

Telegramda izləyin