Avtomobildə şinlərin quraşdırılması zamanı sürücülərin yol verdiyi beş SƏHV

Rusiyalı ekspert Aleksey Stasyuk "Rossiyskaya Qazeta"ya mövsümi şin montajı zamanı əksər sürücülərin buraxdığı beş səhvi açıqlayıb.

1. Təhlükəsizlik texnikasına etinasızlıq

Təkərləri dəyişərkən ilk növbədə uyğun alətlərin, həmçinin işlərin görüləcəyi geniş və düz meydançanın olmasına diqqət yetirmək lazımdır. Əksər avtomobillərin standart domkratları kifayət qədər zəifdir və onların köməyi ilə qaldırılmış kuzov çox qeyri-sabitdir.

Hər hansı ehtiyatsız hərəkət avtomobilin aşmasına səbəb ola bilər ki, bu da böyük ehtimalla onun elementlərinin zədələnməsinə gətirib çıxarar və işi görən şəxs də xəsarət ala bilər. Həmçinin avtomobili domkratla qaldırmazdan əvvəl təkər boltlarını boşaltmaq lazımdır - asılı təkərə həddindən artıq güc tətbiq edilməsi yuxarıda göstərilən nəticələrə səbəb ola bilər.

2. Deşiklərin rezinlə təmiri

Bir neçə ay saxlanıldıqdan sonra yığılmış təkərlərdən birinin boşaldığını görmək olar. Hətta təkərdə adi vint və ya mismar ilişib qalsa belə, onu fitil kimi əl altında olan vasitələrlə təmir etmək məsləhət deyil - bu üsul yalnız şin servisinə çatmaq üçün müvəqqəti həll kimi yararlıdır.

Hətta təzyiqin itirilməsinə səbəb olan kiçik zədələr zamanı belə, bu proses yavaş-yavaş getsə də, şin servisinə müraciət etmək lazımdır, buranın mütəxəssisləri təkəri xüsusi təmir plastırları və ya "göbələk" adlanan vasitələrlə təmir etməyi təklif edəcəklər.

3. Şinlərin düzgün montaj edilməməsi

Şinlərin protektorlarının naxışları müxtəlif cür olur və onların əksəriyyəti diskə və ya avtomobilə quraşdırılarkən ciddi şəkildə müəyyən edilmiş yerləşməni nəzərdə tutur. İstiqamətli şinləriniz varsa, onlar yan tərəfdəki "Rotation" yazısına və təkərin fırlanma istiqamətini göstərən oxa uyğun olaraq montaj edilir. Asimmetrik protektor naxışınız varsa, "Inside" və "Outside" işarələrinə baxın - onlar şinin diskin özündə hansı tərəfə yönəldilməli olduğunu göstərir.

4. Balanslaşdırmada qənaət

Əgər şinlər disklə birlikdə saxlanılırsa, hər mövsümdən əvvəl bütün dəstin balanslaşdırılması tövsiyə olunur. Bundan imtina etmək lazım deyil, çünki istismar zamanı şinlər yeyilir və quraşdırılmış çəki daşları da düşə bilər: bütün bunlar hərəkət zamanı narahatlıq şəklində özünü göstərəcək disbalansa səbəb olur və həm avtomobilin hərəkət hissəsinin elementlərinin, həm də şinlərin özlərinin xidmət müddətini azaldır.

5. Həddindən artıq sıxılmış və ya tam bərkidilməmiş təkər boltları

Bu da həm öz gücü ilə, həm də emalatxanalarda təkərlərin dəyişdirilməsi zamanı tez-tez rast gəlinən səhvdir.

Əl və ya avtomatik alətlə "möhkəm" sıxılmış bərkidici, yaxınlıqda şin servisi olmadıqda hərəkət zamanı xoşagəlməz sürpriz ola bilər - təkəri çıxarmaq lazım gəldikdə onun boltları özünüzlə gəzdirdiyiniz açarla açılmaması mümkündür.

Əks vəziyyət də heç də yaxşı deyil - hərəkət zamanı açılmış təkər təkcə sizin üçün deyil, digər hərəkət iştirakçıları üçün də böyük təhlükə yaradır. Bunu internetdə kədərli sonluqla bitən çoxsaylı videolar da təsdiqləyir. Ona görə də bu məqama xüsusi diqqət yetirmək vacibdir.(oxu.az)

Telegramda izləyin