Gözdən əlil yaşlı cütlük oğullarının öldüyünü dörd gün sonra anlayıb

Hindistanda yaşayan gözdən əlil olan və yeriməkdə çətinlik çəkən yaşlı ər-arvad 30 yaşlı oğlunun dünyasını dəyişdiyini 4 gündən sonra başa düşüblər.

Sonxeber.az xarici mediaya istinadən xəbər verir ki, 60 yaşlı Kaluva Ramana və 65 yaşlı Şantikumara Kumari oğulları Pramodun ölümündən sonra yemək və su istəsələr də, cavab almayıblar. Cütlüyün yeriyə bilmədiyi və səsləri zəif olduğu üçün qonşularından kömək istəyə bilmədikləri bildirilib.

Hadisə evdən gələn pis qoxunu qonşuların hiss edib polisə müraciət etməsi ilə üzə çıxıb. Polis yarı huşunu itirmiş və ağzından köpük çıxan cütlüyü oğlunun çürümüş cəsədi ilə birlikdə tapıb və dərhal onlara yemək və su verib.

Polis Pramodun valideynlərinə yemək verdikdən sonra yuxuda öldüyünü fərz edir. Polis məmuru Surya Nayak, "Qonşular səsləri zəif olduğundan kömək çağırışlarını eşitməmiş ola bilər. Ölümün dəqiq səbəbi yarılmadan sonra məlum olacaq"- dedi.

Spirtli içki aludəçisi olduğu deyilən Pramodun həyat yoldaşının iki qızı ilə birlikdə evdən çıxdığı öyrənilib. Pramodun cəsədi ölüm tarixini və səbəbini müəyyən etmək üçün xəstəxanaya göndərilib.

Polis cütlüyün hazırda şəhərin başqa bir yerində yaşayan böyük oğulları Pradeeplə birlikdə qaldığını və lazımi dəstəyi aldıqlarını açıqladı.

Vüsalə İbrahimli

Telegramda izləyin