İstefa verən müdafiə naziri intihara cəhd etdi

Cənubi Koreyanın həbs edilmiş keçmiş müdafiə naziri Kim Yong-Hyun intihara cəhd edib.

"Qafqazinfo" xəbər verir ki, bu barədə məlumatı "Yonhap" agentliyi yayıb.

Bildirilib ki, sabiq nazir Seulun şərqində istintaq təcridxanasında həyatına son qoymağa çalışıb.

Bununla belə, hadisənin detalları açıqlanmayıb.

Qeyd edək ki, Kim Yong-Hyun ölkə Prezidenti Yun Sok Yola qiyam təşkilində kömək etmək ittihamı ilə həbs edilib. Prokurorluq keçmiş naziri qiyam zamanı "vacib fəaliyyətlərdə" və hakimiyyətdən sui-istifadədə ittiham edərək onun həbsinə order vermişdi.

Onu da xatırladaq ki, dekabrın 3-də Cənubi Koreya prezidenti ölkədə hərbi vəziyyət elan edib. Bundan sonra orduya paytaxta daxil olmaq və parlamenti mühasirəyə almaq əmri verilib. Lakin parlamentdə səsvermə ilə bütün bu qərarların ləğvi barədə qətnamə qəbul edilib. Sənədin lehinə 190 deputat səs verib. Bunun ardınca, Yun Sok Yol geri addım ataraq ölkədəki hərbi vəziyyəti ləğv edəcəyini açıqlayıb.

Daha sonra Kim Yong-Hyun hərbi vəziyyətin elan olunmasından sonra yaranan vəziyyətə görə vətəndaşlardan üzr istəyib və istefa verib. Prezident Yun Sok Yolun isə ölkədən çıxışına qadağa qoyulub.

Telegramda izləyin