Əsəd Suriyadan hamını aldadıb qaçdı – YENİ FAKTLAR

Bəşər Əsəd öz planlarını ən yaxın çevrəsindən belə gizlədərək Suriyanı tərk edib.

Lent.az bildirir ki, mənbələrin "Reuters"ə verdiyi məlumata görə, ordu, ailə və müttəfiqlərin müqavimət göstərməməsi üçün qaçması diqqətlə planlaşdırılıb.

Şənbə günü axşam Əsəd Müdafiə Nazirliyinin binasında yüksək səviyyəli hərbi və təhlükəsizlik rəsmiləri ilə görüş keçirib. O, Rusiyadan yardımın yolda olduğunu deyib və komandirləri mövqelərini saxlamağa çağırıb. "O, hamını aldadıb. Qoşunları dəstəkləmək və ya müdafiə təşkil etmək niyyəti yox idi", - ərəb analitik mərkəzinin direktoru Nadim Huri bildirib.

Əslində Əsəd artıq bir qaçış planı hazırlayıbmış. Köməkçilərin dediyinə görə, o, prezident aparatına evə getdiyini desə də əslində hava limanına gedibmiş. O, guya çıxış hazırlamaq üçün müşaviri Buseyn Şabanı yanına dəvət edib, lakin o gələnə qədər o, artıq orada olmayıb.

Əsəd dekabrın 8-də transponderi qüsurlu olan təyyarə ilə Dəməşqdən uçub. Onun son mənzili ailəsinin əvvəllər təxliyə olunduğu Moskva olub. Bu arada döyüşlər davam edib: "Həyat Təhrir əl-Şam" qruplaşmasının üsyançıları Hələbi ələ keçirərək sürətlə paytaxta doğru irəliləyiblər.

Əsədin əsas müttəfiqləri - Rusiya və İran hərbi yardım göstərməkdən imtina ediblər. Noyabrın sonunda Əsəd Moskvaya səfər edib və orada Kremldən müdaxilə etməyi xahiş edib. Lakin üç diplomatik mənbənin bildirdiyinə görə, ondan imtina edilib. Rusiya hakimiyyəti Ukraynadakı müharibəyə köklənib və Əsədi xilas etmək imkanını görməyib.

Şahidlərin sözlərinə görə, Əsəd İranın xarici işlər naziri Abbas Arakçi ilə görüşdə depressiyaya düşüb. O, ordunun öz mövqeyini saxlaya bilmədiyini, lakin İsrailin İran qüvvələrinə zərbə endirməsi riski səbəbindən birbaşa yardım tələblərindən yayındığını etiraf edib.

Hakimiyyəti saxlamaq mümkün olmadığı aydınlaşdıqda, Rusiya onun "evakuasiyasının" təhlükəsizliyini təmin etməyi öz üzərinə götürüb. Rusiya diplomatları Qətər, Türkiyə və hətta "Həyat Təhrir əl-Şam"ın nümayəndələri ilə Əsədin ölkədən təhlükəsiz şəkildə çıxması ilə bağlı razılığa gəliblər.

Keçmiş baş nazir Məhəmməd Cəlalinin sözlərinə görə, onun Əsədlə son söhbəti qaçmazdan bir gecə əvvəl olub. "Mən ona Homsdan insanların çaxnaşma və kütləvi şəkildə qaçması barədə danışdım. Cavab verdi: "Sabah görüşərik". Bu, onun son sözləri idi", - Cəlali "Al Arabiya"ya deyib.

Telegramda izləyin