"Məktəblərdə şagird davranış qaydaları tətbiq olunmalıdır" - AÇIQLAMA

Sosial şəbəkələrdə Sumqayıt şəhər 38 nömrəli tam orta məktəbdə müəllimin şagirdi stulla vurmasına dair görüntülər yayılıb.

Məsələ ilə əlaqədar Abşeron-Xızı Regional Təhsil İdarəsindən araşdırma aparıldığı bildirilib.

Bəs görəsən məktəbdə baş verən bu hadisələrin qarşısının alınması üçün hansı addımlar atılmalıdır?

Mövzu ilə bağlı Sosial Tədqiqatlar Mərkəzinin sektor müdiri, təhsil tədqiqatçısı Elmin Nuri Sonxeber.az – a açıqlama verib:

"Hələ sentyabr ayından mən şəxsən bildirmişəm ki, bütün məktəblərimizdə şagird sayından, paytaxt və regionda yerləşməsindən asılı olmayaraq şagird davranış qaydaları artıq özünün bütün maddələri ilə tətbiq olunmalıdır. Bu tədris ilinin əvvəlindən bəri bu cür hadisələr baş verməkdə davam edir. Bu hadisələrin arasında şagirdlərin bir-birini bıçaqlama halları da az deyil. Təxminən 2 həftə əvvəl rəsmi şəkildə bildirmişik ki, bizdə şagird qaydaları bütün məktəblərdə tətbiq olunacaq. 3 ilə yaxındır ki, biz bunu gözləyirik. Paytaxt Bakıda az sayda məktəbdə pilot layihə tətbiq olunur. Amma bu barədə ictimaiyyətə məlumat verilmir. Düzdür, şagird davranış qaydalarında müəyyən qədər ifrata varmalar var. Amma məktəbdə bu kimi neqativ halların qarşısını almaqdan ötrü çox yaxşı və praktiki qaydalar var. Şagird davranış qaydaları tətbiq olunmayana qədər əmin ola bilərsiniz ki, bu kimi halların şahidi olacağıq.
Sumqayıtda baş verən hadisənin də kökündə məhz həmin qaydaların tətbiq olunmaması durur. Məni narahat edən məsələlərdən biri də budur ki, biz məktəbdə bu kimi halların qarşısının alınmasına fokuslanmaqdansa, haqlı və haqsız tərəf axtarırıq. Bir qisim deyir, bu hərəkət müəllim adına yaraşmır, digər qisim isə deyir ki, müəllim düz edib. Amma bizə haqlı və ya haqsız axtarmaqdan çox, əl-ələ verib bu məsələni həll etməyə çalışmaq lazımdır. Bu gün şagirdin başına stul vurulubsa, sabah daha böyük problemlə nəticələnəcək addım atıla bilər. Bunu müəllim edirsə, məktəbin imicinə ikiqat zərər gəlir. Belə olan halda heç kəs düşünmür ki, müəllim də insandır, onun da əsəblərinin tab gətirmədiyi hallar var. Gəlin açıq danışaq. Hər birimizin həyatımızda elə situasiyalar baş verib ki, valideyinlərimiz hədsiz dərəcədə əsəbləşiblər, stres yaşayıblar. Bu valideyinin doğma övladı ilə olan münasibətdir. Bir sinifdə 30-dan yuxarı şagird olanda və onların hərəsi ayrı mühitdən gələndə görün müəllim hansı stresləri keçirir. Mən bunları ona görə demirəm ki, müəllimə haqq qazandırıram. Belə deyil. Şagird də bizimdir, müəllim də. Gəlin ortaq bir nöqtədə dayanaq. Bu hadisədə müəllimlə bağlı hüquqi qaydada tədbir görüləcək. Əmin olun ki, bu dəqiqə ən çox pis olan elə həmin müəllimin özüdür. Hətta bu cəzalar, müzakirələr olmasaydı da, müəllim yenə özünü günahkar sayacaqdı. Buna tam əmin ola bilərsiniz. Bu məsələlərin həlli üçün ortaq yol tapılmalıdır. Həmin yol da məktəblərdə şagird davranış qaydalarının tətbiq olunmasıdır".

Çiçək Sadatova

Telegramda izləyin