Cəlilabadda həkimlə xəstə arasında nə baş verib?

Cəlilabad rayonunun Uzuntəpə kənd sakini 58 yaşlı Füzuli İmanov rayon xəstəxanasında həkim tərəfindən döyüldüyünü iddia edib.

"Qafqazinfo"ya müraciət edən şikayətçinin sözlərinə görə, xəstəxanaya azyaşlı nəvələrinin halı pisləşdiyi üçün müraciət edib. O deyir ki, uşaqlardan birinin səhhətinin ağırlaşdığını görən zaman Davud adlı həkimə etiraz edib və kömək istəyib. Bu zaman da müqavimətlə üzləşib.

Füzuli İmanovun iddiasına görə, həkim tərəfindən təpiklənərək otaqdan çıxarılıb. Vətəndaş məsələ ilə bağlı Cəlilabad Rayon Prokurorluğuna müraciət etdiyini də əlavə edib.

Məsələ ilə bağlı TƏBİB-ə müraciət etdik. Qurumdan sorğumuza belə cavab aldıq: "Dekabrın 22-si saat 19:30 radələrində vətəndaş F.İmanov Cəlilabad rayon Mərkəzi Xəstəxanasının həkim-pediatrı Davud Qurbanova qarşı fiziki zorakılıq etməyə cəhd göstərib. Həkim hadisədən uzaqlaşmağa çalışsa da, müqavimətlə üzləşib.

Hazırda hadisənin detalları hüquq-mühafizə orqanları tərəfindən araşdırılır. Araşdırmanın nəticəsinə uyğun olaraq müvafiq tədbirlər həyata keçiriləcək.

Telegramda izləyin