60 illik araşdırmanın nəticəsi: Narıncı pişiklərin sirri açıldı

60 illik araşdırmadan sonra pişiklərdəki narıncı rəngin nədən qaynaqlandığı aşkar edilib.

Publika.az xəbər verir ki, bununla bağlı "Stanford" Universitetinin genetiki Qreq Barşın rəhbərlik etdiyi tədqiqat qrupu araşdırma aparıb.

Tədqiqat qrupu narıncı tüklü pişiklərin dəri hüceyrələrində tapılan "Arhgap36" adlı genin digər pişiklərə nisbətən 13 dəfə çox RNT istehsal etdiyini müəyyən edib.

Bu genin zülal kodlayan hissəsindəki mutasiya əvəzinə, genin ifadəsinə təsir edən əskik DNT ardıcıllığı aşkar edilib.

Tədqiqatlar həmçinin cinslər arasında narıncı rəng fərqini də izah edib. Mutasiya olunmuş gen "X" xromosomunda yerləşdiyi üçün erkək pişiklərdə yalnız bir, dişilərdə isə iki nüsxə var. Bu, dişi pişiklərin tüklərində rəngli naxışlara səbəb olur.

Tədqiqatçılar narıncı rəng piqmentinin pişiklərin ümumi sağlamlığına mənfi təsir göstərmədiyini vurğulayıblar.

Telegramda izləyin