Zibillikdən aşkarlanan kitab 40 min funt sterlinqə satılacaq

İngiltərədə "Harri Potter və Fəlsəfə Daşı"nın ilk nəşri son anda zibillikdən çıxarılıb.

Oxu.Az BBC-yə istinadən xəbər verir ki, indi sahibləri onun sayəsində hərracda təxminən 40 min funt sterlinq əldə etməyi planlaşdırırlar.

Nadir nəşri NLB auksion evinin meneceri Daniel Pirs Brikshem şəhərindən olan mərhum naməlum kişinin əşyaları arasından tapıb. Kitab utilizasiya üçün nəzərdə tutulmuş bir yığın əşyanın içərisində olub.

Pirs bildirib ki, kitab 20 ildir ki, rəfdə qalıb.

Onun sözlərinə görə, tapılan nüsxə əla vəziyyətdədir, baxmayaraq ki, belə kitablar adətən köhnəlmiş və ya zədələnmiş şəkildə satılır.

Qeyd edək ki, "Harri Potter və Fəlsəfə Daşı"nın ilk tirajı 500 nüsxə olub. Onlardan 200-ü mağazalara, 300-ü isə ictimai kitabxanalara göndərilib.

Kitabın birinci səhifəsində karandaşla "2 funt sterlinq" yazılıb - bu, onun kitabxanadan satıldığı qiymətdir.

Telegramda izləyin