İlon Mask 4 yaşlı oğlunu niyə özü ilə hər yerə aparır?

"Space X" və "Tesla"nın qurucusu "X" platformasının sahibi, milyarder hara gedirsə getsin, 4 yaşındakı oğlunu özü ilə aparır. 3 fərqli qadından ümumilikdə 12 uşaq sahibi olan Maskın Lil X adı qoyduğu oğluna düşkünlüyü hər kəsin diqqətini çəkir. Dünyanın ən zəngin adamının övladını daim özü ilə gəzdirməsi isə bir sıra iddiaların ortaya atılmasına səbəb olub.

Ölkə.Az xarici KİV-ə istinadla xəbər verir ki, Maskın bu addımı onun oğlunu çox sevməsi, yoxsa bu işin arxasında daha strateji səbəb dayanması barədə suallar yaradıb.

Gəlin, İlon Maskın ailə həyatındakı bu qeyri-adi mənzərəni nəzərdən keçirək.

Yaşıdları parkda oyun oynayarkən Lil X iş iclaslarındadır ya da dünya liderləri ilə poz verir.
Hətta Maskın danışdığı konfranslardan birində səhnəyə çıxan Lil X-in atasının ayağını qucaqladığı, səhnədən düşürüldükdən sonra yemə geri qayıtdığı anlar ictimaiyətdə narahatlıq doğurmuşdu. Uşaq inkişaf mütəxəssisləri bu yaşlardakı uşağın nizamlı həyata ehtiyac duyduğunu deyir. Bu gün 4 yaşında olan Lil X isə uşaqlığından bəri xüsusi təyyarələrlə bir qitədən başqa qitəyə, iş səyahətlərinə gedir.

Ən pisi isə odur ki, bütün bunların Maskın imici üçün atdığı addımlar olduğu iddia edilir.

Qeyd olunur ki, adı çox sayda böhran və qalmaqallarda hallanan milyarder oğlu vasitəsilə daha humanist imic formalaşdırmağa çalışır.
Hətta "Tesla" səhmlərinin ucuzlaşdığı ya da sosial şəbəkə paylaşımlarına görə tənqid olunduğu vaxtlarda Lil X-in daha çox ön planda olması bu iddiaları gücləndirmişdi.

Uşağın anası Enn Qrayms da oğlunun bu qədər kameralar qarşısında olmasından məmnun deyil. O, müsahibələrinin birində deyib:

"Uşaqların göz önündə olmaması gərəkdiyini düşünürəm. Amma oğlum daim göz önündədir. İlon onu bir növ vəliəhdi kimi görür".

Məlumata görə, Mask oğlunun anası ilə qəyyumluq "müharibə"si aparır və uşağı anasına göstərmir. Qrayms ötən il sosial şəbəkədə paylaşım edərək İlona oğlunu görməyə icazə verməsi üçün çağırış etsə də, qısa müddət sonra silmişdi. Onun paylaşımını hansı səbəbdən silməsi isə maraq doğurmuşdu.

Daha sonra üzə çıxan məhkəmə sənədləri İlonun qəyyumluqla bağlı mürcaiət üçün Texas ştatını seçdiyini göstərdi.

Bəs niyə Texas?

Çünki buradakı qaydalar aliment ödənişlərinə məhdudiyyət qoyur. Yəni dünyanın ən varlı adamı da alimentə görə hesab-kitab edirdi. Lil X-in ana nənəsi də İlon Maska sosial şəbəkələrdən səslənmişdi: "Xahiş edirəm, İlon, bu, ailəmiz üçün çox ağrılıdır. Uşaqlar nənənələrini görməlidir".

Bu duyğusal çağırışlar uşağın anası ilə atası arasındakı hüquqi mübarizənin ortasında qaldığını göstərir.

İlonun digər uşaqları haradadır?

Onun digər uşaqlarının gözlərdən uzaq həyatı seçdiyi ya da ataları ilə münasibətlərinin daha məsafəli olduğu düşünülür. Hətta bəzi uşaqları ilə aralarındakı münasibətlərin qırıldığı deyilir. Hətta onun cinsiyyətini dəyişdirən bir övladı rəsmi olaraq soyadnı dəyişmiş və artıq bioloji atası ilə hər hansı əlaqə yaratmaq istəmədiyini demişdi. Bu da Maskın necə ata olması barədə suallar doğurur.

Balaca Lil X böyüyəndə bu həyat təcrübəsinin onu necə formalaşadıracağını isə zaman göstərəcək.

Telegramda izləyin