Egeyədə zəlzələ fırtınası: Nə baş verir?

Egeyədə, xüsusilə vulkanik Santorini adası ətrafında zəlzələ fırtınası davam edir. Bu hadisə ilə bağlı nə bilinir və mütəxəssislərin şərhləri nədir?

Qaynarinfo xəbər verir ki, Türkiyənin Fövqəladə Halların İdarə Olunması Agentliyi (AFAD) Egeyəydəki seysmik aktivliyi yaxından izləyir. AFAD-ın verdiyi açıqlamaya görə, Türkiyə sahillərinə ən yaxın zəlzələ 140 km məsafədə baş verib.

Bu vəziyyət 2011-ci ili xatırladır. AFAD dünənki açıqlamasında belə bir məqamı vurğulayıb: "2011-2012-ci illərdə də eyni bölgədə oxşar intensiv seysmik aktivlik müşahidə olunmuş, 14 ay davam edən bu aktivlik hər hansı vulkanik hərəkətliliyə səbəb olmamışdır".

AFAD-ın Zəlzələ və Risk Azaltma Baş İdarəsinin Zəlzələ Şöbəsinin müdiri professor Aykut Akgün də hadisəni yaxından izləyən mütəxəssislər arasındadır. O, Egey dənizində baş verən zəlzələ fırtınasının təbii zəlzələlər olduğunu, bölgədə belə hadisələrin baş verməsinə əlverişli geoloji mühitin mövcudluğunu bildirir.

Akgün əlavə edib: "Burada vulkanik aktivliyin yeni olduğunu bilirik. Lakin vulkanik aktivliyin inkişaf etməyə başlamasının bu zəlzələlərə səbəb olduğuna dair əlimizdə sübut yoxdur. Əgər belə bir hal baş versə də, bu, bizi təəccübləndirməz, çünki bu bölgə aktiv vulkanizm inkişaf etdirə biləcək bir ərazidir. Bu proses sönə də bilər, bir qədər də arta bilər. Buna görə də daimi müşahidə aparmaq və diqqətli olmaq vacibdir".

AFAD-ın 28 yanvar 2025-ci ildən etibarən bölgədə müşahidə olunan zəlzələ fırtınası ilə bağlı verdiyi son açıqlama belədir:

- Zəlzələlərin sayı 400-ü keçib.
- İndiyə qədər qeydə alınan ən güclü zəlzələ 4.8 bal gücündə olub.
- Zəlzələlər Santorini adasının təxminən 25 km şimal-şərqində baş verir və 5-25 km dərinlikdə qeydə alınır.
- Türkiyə sahillərinə ən yaxın zəlzələ 140 km məsafədə baş verib.
- 2011-2012-ci illərdə də eyni bölgədə oxşar seysmik aktivlik müşahidə olunub və 14 ay davam edən bu proses heç bir vulkanik hərəkətə səbəb olmayıb.
- Türkiyəli alimlər və tədqiqatçılar bu seysmik aktivliyi AFAD ilə koordinasiyalı şəkildə dəyərləndirir və həm zəlzələ, həm də mümkün vulkanik aktivlik və sunami ehtimalları nəzərdən keçirilir.

Bundan əlavə, AFAD və mütəxəssislər vətəndaşları sosial mediada yayılan dezinformasiyalara inanmamağa və rəsmi mənbələri izləməyə çağırır.

Telegramda izləyin