"Azərbaycan dilinin tədris saatlarının artırılması şagirdlərin cəmiyyətə və əmək bazarına inteqrasiyasını asanlaşdıracaq" - AÇIQLAMA

"Gələcəkdə tədrisi digər dillərdə aparılan məktəblərdə Azərbaycan dili fənninin tədris müddəti həftəlik 3 saatdan 4 saata artırıla bilər" - bunu elm və təhsil naziri Emin Əmrullayev fevralın 6-da keçirdiyi brifinqdə deyib.

Nazir qeyd edib ki, hamı istədiyi dildə təhsil almaqda sərbəstdir:

"Biz Azərbaycan dili fənninin dərs saatlarını 2-dən 3-ə artırmışdıq. Amma lazım gələrsə, növbəti illərdə xarici dillərdə dərslərin tədris olunduğu siniflərdə Azərbaycan dili fənninin dərs saatları daha da artırılacaq. Hamı istədiyi dildə təhsil almaqda sərbəstdir. Amma təhsildə əsas məqsədlərimizdən biri də ana dilimizi unutmamaqdır".

Bəs görəsən bu addım hansı dəyişikliklərə səbəb olacaq?

Mövzu ilə bağlı təhsil eksperti Kamran Əsədov Sonxeber.az - a açıqlama verib:

"İlk növbədə, bu addım şagirdlərin Azərbaycan dili biliklərinin dərinləşməsinə və dil bacarıqlarının inkişafına şərait yaradacaq. Hazırda bəzi məktəblərdə Azərbaycan dili fənninin həftədə 3 saat tədris edilməsi şagirdlərin dil bacarıqlarının formalaşmasında yetərsiz ola bilər. Tədris saatlarının artırılması ilə şagirdlər daha çox praktika və nəzəri bilik əldə edərək, dilin qrammatik qaydalarını və üslub xüsusiyyətlərini daha yaxşı mənimsəyə bilərlər.

Bununla yanaşı, Azərbaycan dilinin tədris saatlarının artırılması şagirdlərin cəmiyyətə və əmək bazarına inteqrasiyasını asanlaşdıracaq. Dövlət dilini yaxşı bilən məzunlar gələcəkdə müxtəlif sahələrdə daha uğurlu karyera qura bilərlər. Əmək bazarında Azərbaycan dili biliklərinə olan tələbatın yüksək olduğunu nəzərə alsaq, bu dəyişiklik gənclərin məşğulluq imkanlarını artıracaq.

Azərbaycan Respublikası Konstitusiyasının 21-ci maddəsinin I bəndində qeyd edilir ki, "Azərbaycan Respublikasının dövlət dili Azərbaycan dilidir. Azərbaycan Respublikası Azərbaycan dilinin inkişafını təmin edir." Bu baxımdan, tədris saatlarının artırılması dövlət dilinin tətbiqinin genişləndirilməsi və inkişaf etdirilməsi istiqamətində mühüm addımdır.

Dünya təcrübəsinə nəzər saldıqda, bir çox ölkələrdə dövlət dilinin tədrisinə xüsusi diqqət yetirilir. Məsələn, Kanadada ingilis və fransız dilləri rəsmi dillərdir və hər iki dilin tədrisinə məktəblərdə geniş yer ayrılır. İsveçrədə də çoxdillilik siyasəti tətbiq olunur və şagirdlər bir neçə rəsmi dili öyrənirlər. Bu təcrübələr göstərir ki, dövlət dilinin tədrisinə ayrılan vaxtın artırılması cəmiyyətin birliyini və milli kimliyini gücləndirir.

Nəticə etibarilə, Azərbaycan dili fənninin tədris müddətinin artırılması şagirdlərin dil bacarıqlarının inkişafına, onların cəmiyyətə və əmək bazarına inteqrasiyasına, eləcə də milli kimliyin və sosial birliyin güclənməsinə mühüm töhfə verəcəkdir".

Çiçək Sadatova

Telegramda izləyin