92 yaşlı qadının mədəsindən 28 xurma, 35 zeytun çəyirdəyi və 5 daş çıxarıldı

Türkiyədə 92 yaşlı Şərifə Ayın mədə və bağırsaqlarından əməliyyat yolu ilə 28 xurma, 35 zeytun çəyirdəyi və 5 daş çıxarılıb. O, uğurlu əməliyyatdan sonra sağlığına qovuşub.

BAKU.WS xəbər verir ki, bu barədə trt haber məluma yayıb.

Şərifə Ay fevralın 5-də qarın ağrısı və qusma şikayəti ilə xəstəxanaya aparılıb. Müayinə zamanı onun mədə və bağırsaqlarında yad cisimlər aşkar edilib və o, Zonuldak Bülənt Ecevit Universiteti (BEUN) Xəstəxanasına göndərilib.

Həkimlər Ayın bağırsağında 4 santimetr böyüklüyündə bir daşın tıxanıqlığa səbəb olduğunu, bu isə orqanın çürüməsinə və deşilməsinə yol açdığını müəyyən ediblər.

Bundan əlavə, onun mədəsindən 28 xurma və 35 zeytun çəyirdəyi, həmçinin xurma çəyirdəklərinin sərtləşərək əmələ gətirdiyi 5,5-6 santimetrlik 5 daş çıxarılıb.

Təxminən 2 saat davam edən əməliyyatdan sonra 5 gün reanimasiya şöbəsində saxlanılan Ay daha sonra palataya köçürülüb və sağlamlığına qovuşub.

Əməliyyatı həyata keçirən dosent İlhan Taşdöven bildirib ki, xəstənin qan dəyərlərinin yüksəlməsi səbəbindən təcili əməliyyata ehtiyac yaranıb.

"Hazırda xəstəmiz sağlamdır. Amma mədədəki bu cür sərtləşmiş qidalar çox təhlükəlidir. Mədə onları həzm edə bilmir və zamanla daşlaşaraq mədə və bağırsaqların deşilməsinə səbəb ola bilər. Ona görə də belə vərdişlər tövsiyə olunmur", – deyə Taşdöven qeyd edib.

Şərifə Ay isə xurma və zeytini çox sevdiyini, lakin çəyirdəklərini də udduğunu etiraf edib.

"Mən belə olacağımı hardan bilim? Qızım çəyirdəkləri verməyimi istədi, amma 'Olmaz' deyib udmuşdum. Sonra nə yemək yeyə bildim, nə də su içə bildim. Oğlum halımı görüb məni xəstəxanaya apardı. Çox qorxdum, sanki ölürdüm. İndi yaxşıyam və bir daha əsla çəyirdəklərə toxunmaram. Heç kim çəyirdək udmasın", – deyə o bildirib.

Telegramda izləyin