Dünyanın "cəhənnəmə açılan qapıları" - FOTO

Dünyanın müxtəlif yerlərində geoloji xüsusiyyətləri, vulkanik aktivliyi və ya əlçatmazlığı ilə diqqət çəkən və "cəhənnəm qapıları" adlandırılan bir sıra qeyri-adi məkanlar mövcuddur.

Sonxeber.az Qaynarinfo-ya istinadən Türkiyədən Keniyaya, Sibirdən Türkmənistana qədər bu sirli yerlər haqqında maraqlı faktları təqdim edir:

Pluton qapısı - Türkiyə
Türkiyənin Pamukkale bölgəsində yerləşən Pluton Qapısı (Ploutonion) qədim dövrlərdə yeraltı tanrısı Pluton (Hades) üçün tikilmiş bir məbədin qalıqlarıdır. Antik inanclara görə, bu yer ölülər dünyasına keçid qapısı hesab olunurdu.

Bu məbəd 2013-cü ildə yenidən kəşf edilib və qazıntılar aparılıb. O mağaraya açılan bir keçid və onun ətrafında yerləşən arenadan ibarətdir. Mağaranın içi volkanik qazlarla, əsasən də karbondioksidlə (CO₂) dolu olduğundan, yalnız kahinlər içəri girə bilirdi. Qədim romalılar bu qazı Tanrıların bir möcüzəsi hesab edirdilər, lakin əslində bu, təbii vulkanik proseslərin nəticəsidir.

Türkiyə Mədəniyyət Nazirliyinin verdiyi məlumata görə, Pluton Qapısının yerləşdiyi Hierapolis qədim şəhəri "Müqəddəs Şəhər" (Kutsal Kent) adlanırdı. Üramızdan əvvəl I əsrdən eramızın III əsrinə qədər inşa edilən bu məkan qədim dövrdə mühüm dini və turistik məkan olub. Buraya gələn ziyarətçilər mağaranın içinə quş buraxıblar və quşlar dərhal zəhərlənərək ölüb. İmperator Hadrian, Cicero və Caracalla kimi məşhur tarixi şəxslər də buranı ziyarət edib.

Cəhənnəm qapısı - Keniya
Keniyanın Nakuru bölgəsində yerləşən Cəhənnəm Qapısı Milli Parkı (Hell’s Gate National Park), Naivaşa gölü ilə Longonot və Susva vulkanları arasında yerləşir.

Bu park müxtəlif yabanı heyvan növləri, hündür qayaları və ortasından keçən Ol Jorova dərəsi ilə məşhurdur. Dərə vulkanik və tektonik proseslərin təsiri ilə formalaşıb və bu gün də güclü geotermal aktivliyə malikdir. Burada hələ də qaynar bulaqlar və geotermal gayzerlər püskürməkdədir.

Darvaza krateri - Türkmənistan
Türkmənistanın Qaraqum səhrasında yerləşən Darvaza krateri 1971-ci ildə Sovet geoloqlarının neft axtarışı zamanı təsadüfən aşkar edilib.

Ərazidə neft yerinə böyük bir təbii qaz yatağı tapılıb, lakin qazıntı işləri nəticəsində sondaj qurğusu çökərək 70,1 metr enində və 20,1 metr dərinliyində bir krater yaradıb. Kraterdən yayılan metan qazı təhlükəli olduğuna görə, alimlər onu yandırmağa qərar veriblər. Lakin gözləntilərin əksinə olaraq, yanğın qısa müddətdə sönməyib və bu günə qədər davam edir.

Bölgə yerli əhali tərəfindən "Cəhənnəm Qapısı" adlandırılır və gecələr qırmızı alovlarla yanan nəhəng bir dəlik kimi görünür. Bu yer dünyanın ən qeyri-adi geoloji möcüzələrindən biri hesab olunur.

Batagayka çökəyi - Sibir
Rusiyanın Uzaq Şərqində yerləşən Batagayka çökəyi 1960-cı illərdə meşələrin qırılması nəticəsində permafrostun əriməsi ilə yaranıb.

100 metr dərinliyində və təxminən 1 kilometr uzunluğunda olan bu nəhəng yarıq yerli sakinlər tərəfindən "Yeraltı Dünyaya Açılan Qapı" adlandırılır. Çökək hələ də genişlənməkdədir və iqlim dəyişikliyi səbəbindən daha da böyüyür.

Alimlər Batagayka çökəyini iqlim dəyişikliklərinin təsirini öyrənmək üçün mühüm bir yer hesab edirlər, çünki buradan min illər əvvəl donmuş qalmış heyvan və bitki qalıqları aşkar edilə bilər.

Nəticə

Bu yerlər həm təbiətin gücünü, həm də insan inanclarının geologiya ilə necə iç-içə olduğunu göstərir. Vulkanik qazlarla dolu mağaralardan, alov saçan kraterlərə qədər, bu qeyri-adi məkanlar insanların təxəyyülünü və elm adamlarının marağını hələ də cəlb edir.

Telegramda izləyin