Mixail Saakaşviliyə HÖKM OXUNDU

Gürcüstan məhkəməsi ölkənin keçmiş prezidenti Mixail Saakaşviliyə hökm oxuyub. O, 9 il müddətinə azadlıqdan məhrum edilib.

Oxu.Az bu barədə "Mtavari" nəşrinə istinadla xəbər yayıb.

Bildirilir ki, Saakaşvili 9 milyon lari (təxminən 5.5 milyon manat) məbləğində büdcə vəsaitlərinin mənimsənilməsi işi üzrə təqsirli bilinib.

Həmçinin Saakaşvilinin keçmiş mühafizə rəisi Teymuraz Canaşiya da təqsirli bilinib, lakin o, cəmi 3 000 lari (təxminən 1.7 min manat) məbləğində cərimə ilə cəzalandırılıb.

Qeyd edək ki, Saakaşviliyə qarşı dövlət vəsaitlərinin mənimsənilməsi ittihamı 2014-cü ildə irəli sürülüb. Bu iş Gürcüstanda "Pencək işi" kimi tanınır. İttihama əsasən, Saakaşvili prezidentliyi dövründə dövlət vəsaiti hesabına pencəklər, palto alıb, oğlunun təhsil haqqını ödəyib, kosmetik prosedurlar etdirib, sinə ilə çəkilmiş rəsm əsəri alıb, bahalı avtomobillər və təyyarələr icarəyə götürüb, eləcə də qol saatları əldə edib.

Xatırladaq ki, Saakaşvili 2021-ci ilin oktyabrın 1-də Gürcüstana qayıtdıqdan sonra həbs edilib. O, beş cinayət işi üzrə təqsirləndirilir. Bunlardan iki iş üzrə o, qiyabi olaraq altı il azadlıqdan məhrum edilib.

Ümumilikdə, Tbilisi Şəhər Məhkəməsi ona qarşı dövlət vəsaitlərinin mənimsənilməsi, 7 noyabr 2007-ci ildə etiraz aksiyasının dağıdılması və sərhədi qanunsuz keçmə ittihamları üzrə üç işi araşdırır.

Telegramda izləyin