100 yaşlı barista 67 ildir məzuniyyətsiz işləyir

İtaliyanın şimalındakı Nebbuno şəhərində 100 yaşlı barista (espresso əsaslı qəhvə və digər içkilər hazırlayan və xidmət edən bir şəxs) hər gün fasiləsiz işləyir və sonuncu məzuniyyətini 67 il əvvəl götürüb.

Qaynarinfo xəbər verir ki, bu barədə "The Guardian" yazır.

Anna Possi adlı qadın "Bar Centrale" kafesinin sahibidir və ölkədə bu peşənin ən yaşlı nümayəndəsi hesab olunur. O, hər gün müştərilərinə qəhvə təqdim edir və onlarla söhbətləşir. Uzun illər ərzində bir çox müştərisi onun dostuna çevrilib.

Possi və həyat yoldaşı "Bar Centrale"ni 1 may 1958-ci ildə açıblar. İlkin dövrlərdə burada yalnız qəhvə verilsə də, sonradan menyuya spirtli içkilər də əlavə olunub. 1970-ci illərdə isə kafe musiqi avtomatı və stolüstü futbol masası sayəsində populyar məkanlardan birinə çevrilib.

"İnsanlar bura ünsiyyət qurmaq, rəqs etmək və vaxt keçirmək üçün gəlirdilər", deyə Possi xatırlayır.

Bu gün "Bar Centrale" özünəməxsus atmosferini qoruyub saxlayır. Musiqi avtomatı artıq olmasa da, müştərilərin kitab mübadiləsi edə biləcəyi bir rəf yaradılıb. Bazar günləri isə Possinin öz əlləri ilə bişirdiyi alma piroqu təqdim olunur.

Yaşına baxmayaraq, Possi aktiv və maraqlı qalmağa davam edir. O, hər səhər kompüterində xəbərləri oxuyur və fond bazarını izləyir.

"Mən hələ də öyrənmək və dünyanı daha yaxşı başa düşmək istəyirəm", deyə o bildirib.

Uzun ömrünün sirrini insanlarla ünsiyyətdə və işinə olan sevgisində görən Possi pensiyaya çıxmağı planlaşdırmır. O, gənclərə sevdikləri peşəni seçməyi tövsiyə edir.

Telegramda izləyin