İşdə "qıcıqlandırıcı" musiqi əməkdaşlara necə təsir edir?

İş yerində "qıcıqlandırıcı" musiqi əməkdaşlarda koqnitiv tükənməyə gətirib çıxarır, bu da onları səhvlər etməyə vadar edir.

Oxu.Az-ın "Gazeta.ru"ya istinadən xəbərinə görə, ABŞ-nin Ohayo Universitetinin alimləri bu qənaətə gəliblər.

Araşdırmanın nəticələri "Journal of Applied Psychology" jurnalında dərc olunub.

Bildirilir ki, musiqini ən çox ticarət mərkəzlərinə, fitnes zallarına və ictimai iaşə müəssisələrinə baş çəkərkən eşitmək olar. Kompozisiyaların seçimi müəssisənin konsepsiyasından, hədəf auditoriyadan, günün vaxtından və digər amillərdən asılıdır, lakin demək olar ki, bütün hallarda bu, müştərilərə yönəldilib. Eyni zamanda melodiyaların sayı çox vaxt məhdud olur və məhz əməkdaşlar demək olar ki, hər gün onları dinləmək məcburiyyətində qalırlar.

Musiqinin əmək məhsuldarlığına və işçilərin psixoloji vəziyyətinə necə təsir etdiyini öyrənmək üçün alimlər 166 könüllünün iştirakı ilə araşdırma aparıblar. Təcrübədən əvvəl iştirakçılar musiqinin səsinin yüksəkliyi, sürəti, mürəkkəbliyi və emosional məzmunu ilə bağlı üstünlük verdikləri məqamları bildiriblər.

Daha sonra iştirakçılardan iki növ musiqi seçimindən birini dinləyərkən yaradıcı tapşırığı yerinə yetirmələri xahiş olunub. İlk pleylistə orta mürəkkəblikdə əyləncəli, şən pop-kompozisiyalar daxil olub. Digər seçim daha yavaş, "kədərli", aşağı səslə çalınan melodiyalardan ibarət olub.

Nəticələr göstərib ki, iştirakçılar musiqinin qıcıqlandırıcı olduğunu düşündükləri zaman çox vaxt koqnitiv tükənmə - zehni yorğunluq hissi keçiriblər. Bu problem xüsusilə "stimulları seçmə qabiliyyəti olmayan" insanlar adlanan şəxslərdə daha kəskin şəkildə özünü göstərib. Alimlər izah ediblər ki, "stimul seçimi" birdəfəyə bir sensor məlumat mənbəyinə diqqəti cəmləmək qabiliyyətidir. Diqqətini cəmləməkdə çətinlik çəkənlər tez-tez uyğun olmayan musiqi səbəbindən əhvali-ruhiyyələrinin və iş qabiliyyətlərinin aşağı düşdüyünü ifadə ediblər.

Həmçinin məlum olub ki, "əsəbiləşdirici" kompozisiyaları dinləyərkən iştirakçılar daha ləng düşünüblər, tez-tez şirkətə zərər verən hərəkətlər ediblər və az hallarda uğurlu həll yollarını tapıblar.

Telegramda izləyin