Bu həftəsonu Ay kiçiləcək

Aprelin 12-də, şənbə axşamı tam Ay Yerdəki müşahidəçilərə adi halından daha fərqli formada görünəcək: bir qədər kiçik və parlaqlıq baxımından daha zəif. Bu hal mikroay adlanır və onu çılpaq gözlə görmək olduqca çətin olacaq, çünki fərq çox azdır.

Oxu.Az-ın xəbərinə görə, bu barədə "The Associated Press" (AP) nəşri məlumat verib.

Məlumata görə, mikroay Ayın öz orbitində Yerdən ən böyük məsafədə olduğu zaman yaranır. Bu, daha məşhur olan superaya əks haldır, hansı ki, o zaman Ay həmişəkindən daha çox yaxınlaşır və bir qədər böyük, parlaq görünür.

Mikroayı görmək üçün şənbə axşamı küçəyə çıxmaq və səmanın yaxşı göründüyü yer tapmaq kifayətdir. Baxmayaraq ki, ölçü və parlaqlıqdakı dəyişikliklər nəzərə çarpmaya bilər, lakin bu, nadir və maraqlı astronomik hadisədir.

Belə hadisələr ildə bir neçə dəfə tam Ayın fazası onun orbitinin müəyyən hissələri ilə üst-üstə düşdükdə ​​baş verir. Növbəti mikroay may ayında gözlənilir, ilin sonunda isə ard-arda üç superay olacaq - oktyabr, noyabr və dekabr aylarında.

Telegramda izləyin