Uzunmüddətli tənhalığın qadınlara MƏNFİ TƏSİRİ

Uzunmüddətli tənhalıq hissi qadınlarda erkən ölüm riskini 15 faiz artırır.

Oxu.Az-ın məlumatına görə, belə bir qərara Sidney Universitetinin alimləri gəliblər. Onların tədqiqatlarının nəticələri "BMJ Medicine" jurnalında dərc edilib.

Tədqiqatda 48-55 yaş arası 57 min qadın iştirak edib. Birinci mərhələdə alimlər iştirakçıların psixi sağlamlığı və sosial həyatı haqqında məlumatları toplayıb, sonra isə müşahidəyə başlayıblar.

Tədqiqatçılar 15 il ərzində könüllülər arasında bütün ölüm hallarını qeydə alıblar.

Sonrakı təhlil göstərib ki, 15 illik dövr ərzində heç vaxt tənhalıqdan şikayət etməyən qadınlarda ölüm riski 5 faiz təşkil edib. Lakin mütəmadi olaraq özlərini tənha hiss edən iştirakçılarda vaxtından əvvəl ölüm ehtimalı üç dəfə artaraq 15 faizə çatıb.

Tədqiqat həmçinin tənhalıq hissinin müddəti ilə ölüm riski arasında asılılığı aşkar edib. Alimlər dəqiqləşdiriblər ki, qadınlar özlərini nə qədər uzun müddət tənha hiss ediblərsə, onların həyatının qısalması ehtimalı bir o qədər yüksək olub.

"Orta yaşda qadınlar daha çox ciddi fiziki, psixoloji və sosial dəyişikliklərlə, məsələn, menopauza, təqaüdə çıxma və uşaqların evdən getməsi kimi hallarla üzləşirlər. Bütün bunlar qadının özünü sosial cəhətdən nə dərəcədə aktiv hiss etməsinə təsir göstərə bilər", - deyə alimlər izah ediblər.

Tədqiqatçılar əlavə ediblər ki, tənhalıq artıq çoxdan ürək-damar xəstəlikləri, diabet, depressiya daxil olmaqla müxtəlif mənfi sağlamlıq nəticələri ilə əlaqələndirilib.

Telegramda izləyin