Niyə bir neçə çips ilə kifayətlənə bilmirik və daha çox yemək istəyirik? - Maraqlı səbəb açıqlandı

Bir çoxumuz həyatımızı duzlu qida olmadan təsəvvür edə bilmirik. İstər bir paket çips olsun, istər duzlu qoz-fındıq və ya kartof fri, bir neçə dənə ilə kifayətlənmək demək olar ki, mümkün deyil. Bəs niyə duz bu qədər asılılıq yaradır? Bu, beynimizə və bədənimizə necə təsir edir?

Oxu.Az-ın xəbərinə görə, bu barədə rusiyalı uşaq endokrinoloqu və nutrisioloq Darya Xaykina "Gazeta.ru"ya müsahibəsində danışıb.

Mütəxəssisin sözlərinə görə, duz (NaCl) orqanizmimizin əsas ehtiyacıdır. Tərkibində su-tuz balansının qorunması, sinir impulslarının ötürülməsi və əzələlərin normal işləməsi üçün zəruri element olan natrium var. Natrium qan təzyiqini tənzimləyir və qida maddələrinin hüceyrələrə daşınmasında iştirak edir. Natrium çatışmazlığı halında zəiflik, başgicəllənmə və fikir qarışıqlığı kimi narahatlıqlar ortaya çıxa bilər. Orqanizm bütün gücü ilə bizə nəsə duzlu bir şey yeməyimizi "işarə edəcək".

Lakin həyati funksiyaları qorunması üçün bizə çox az duz lazımdır - gündə təxminən 1,5 qram natrium və bu da təxminən 3,8 q duza bərabərdir. Ümumdünya Sağlamlıq Təşkilatı (ÜST) hipertoniya, insult və ürək-damar xəstəlikləri riskini azaltmaq üçün duzun gündə 5 qramdan (təxminən bir çay qaşığı) çox olmamasını tövsiyə edir. Lakin orta hesabla insan gündə 9-12 qram duz istehlak edir ki, bu da normadan iki dəfə çoxdur. Və bu hamısı deyil.

Duz nikotin və ya kokainə bənzər asılılıq yaradır

"The Journal of Neuroscience" (2008) jurnalında dərc edilən bir araşdırma göstərib ki, duz nikotin və ya kokain qədər asılılıq yarada bilər. Uzun müddət duzsuz pəhriz saxlayan insanlar duzlu qidaları "qeyri-adi dadlı" kimi təsvir ediblər. Bu nə ilə bağlıdır?

Duzlu yemək yediyimiz zaman beynin dofamin (dopamin) sistemi aktivləşir, necə ki, şirin nəsə yeyəndə, cinsi əlaqə zamanı və ya oyun oynayanda bu baş verir. Bu, xoş emosiyalar doğurur və davranış modelini formalaşdırır: qida = sevinc. Razılaşın ki, kimsə özünü sevincdən məhrum etmək istəməz.

Bundan əlavə, əgər siz xroniki stres keçirirsinizsə, o zaman daha çox duz qəbul edəcəksiniz. Yüksək səviyyədə kortizol (stres hormonu) duzlu qidalara olan meyli artırır. Bu onunla bağlıdır ki, duz hipotalamo-hipofiz-adrenal (böyrəküstü vəzi) oxunun aktivliyini azaltmağa kömək edir və bununla da stresli reaksiyanı bir qədər azaldır. 2020-ci ildə siçanlar üzərində aparılan təcrübələr göstərib ki, duz istehlakı narahatlıq səviyyəsini azaldır.

Duz yağlılığı maskalayır və iştahı stimullaşdırır

Duz təkcə yeməyin dadını yaxşılaşdırmır, həm də yağlılığı maskalayır və iştahı stimullaşdırır. Duz və yağın kombinasiyası (birləşməsi) ən güclü asılılıq yaradan qidalardan biridir. Bu niyə bir ovuc duzlu qoz-fındıq və ya kartof fridən sonra dayanmaqda çətinlik çəkdiyimizi izah edir. Yüksək duzluluq həm də toxluq reseptorlarının həssaslığını azaldır - biz tox olanda belə yeməyə davam edirik.

"Duzlu qidalara sevgi kapriz (şıltaqlıq) deyil, fizioloji və neyrokimyəvi proseslərin nəticəsidir. Ancaq yadda saxlamaq lazımdır ki, hər yaxşı şey kimi, duz da normada olmalıdır. Əgər duzlu qidalara daimi həvəs hiss edirsinizsə, o zaman qanınızdakı natrium səviyyəsini yoxlamağa, həmçinin bunun arxasında stres və ya yorğunluğun dayanıb-dayanmadığını da düşünməyə də dəyər", - deyə Darya Xaykina qeyd edib.

Telegramda izləyin