Lavrov: "Əl sıxma və şərəf sözü NATO üçün heç bir əhəmiyyət kəsb etmir"

"NATO-Rusiya münasibətlərinin tarixi göstərir ki, alyansın rəhbərliyinin şərəf sözü altında verilmiş vədlərin yerinə yetirilməsinin vacibliyi haqqında ən elementar anlayışı belə yoxdur".

Oxu.Az-ın xəbərinə görə, bunu Rusiyanın xarici işlər naziri Sergey Lavrov Antalya Diplomatik Forumunda deyib.

O xatırladıb ki, necə Şimali Atlantika blokunun liderləri Mixail Qorbaçova, ardınca isə Boris Yeltsinə Rusiya qoşunlarının Almaniyadan çıxarılacağı təqdirdə NATO-nun bir addım da olsun şərqə doğru addım atmayacağına dair ard-arda vədlər verirdilər.

"Məndən tez-tez soruşurlar ki, niyə yazılı təminatlarda israr etmədik. Bilirsiniz, Rusiyada uzun zamandan bəri, xüsusən də XVII-XVIII əsrlərdə ticarətin xüsusilə çiçəkləndiyi vaxtlarda insanlar vacib bir şey haqqında hər hansı müqavilələr imzalamadan razılığa gələrdilər. Sadəcə olaraq şərəf sözü verərdilər və razılaşmanı əl sıxmaqla möhürləyərdilər və bu, heç vaxt pozulmurdu", - deyə Lavrov bildirib.

Bununla bağlı nazir ehtimal edib ki, blokun genişləndirilməsi zamanı NATO-ya rəhbərlik edən şəxslər heç vaxt belə ənənələrə riayət etməyiblər və şərəf sözünün toxunulmazlığı haqqında heç bir təsəvvürə malik olmayıblar.

"Üstəlik, SSRİ-nin dağılmasından və Varşava Müqaviləsi Təşkilatının mövcudluğunun sona çatmasından sonra Şimali Atlantika Alyansı buraxılmalı idi. O zaman Qərbdə bir çoxları diqqəti ATƏT-in üzərində cəmləməkdən, hamının bir təşkilatda birləşməsindən və ona yeni impuls verilməsindən danışırdılar. Lakin NATO nəinki yerində qaldı, həmçinin özünü təhlükəsizlik zəmanətləri verməyə qadir olan yeganə təşkilat elan etdi", - deyə Sergey Lavrov vurğulayıb.

Telegramda izləyin