Türkiyədə yeni tapıntı: Eros və heyvan təsvirləri olan sarkofaq

Türkiyənin cənub-qərbində, Muğla vilayətində yerləşən qədim Stratonikea şəhərində arxeoloqlar zəngin bəzəklərlə işlənmiş mərmər sarkofaq aşkar ediblər. Unikal tapıntı şəhərin ictimai və ticarət mərkəzi olan "aqora"da aparılan qazıntılar zamanı üzə çıxıb.

Oxu.Az xəbər verir ki, bu barədə "Daily Sabah" məlumat yayıb.

Bildirilib ki, Stratonikea şəhəri UNESCO-nun ilkin Dünya İrsi siyahısına daxil edilib və Ellinizm, Roma və Bizans dövrlərində mühüm mədəniyyət mərkəzi olub.

Qazıntı işlərinə rəhbərlik edən professor Bilal Söğüt sarkofaqın yüksək sənətkarlıqla hazırlandığını bildirib.

"Sarkofaqın üzərində Yunan məhəbbət tanrısı Erosun təsvirləri, üzüm, lalə, şam qozaları, nar və zeytun yarpaqları ilə bəzədilmiş dekorativ çələnglər təsvir olunub. Künclərində qoç başları, dar tərəflərində isə öküz başları var. Bütün kompozisiya zəngin və detallı şəkildə işlənib", - deyə professor qeyd edib.

Onun sözlərinə görə, bu cür sarkofaqlar qədim dövrdə ixrac məqsədilə hazırlanıb və Stratonikeanın sənət və mədəniyyət mərkəzi kimi əhəmiyyətini əks etdirir.

Tapıntı açıq hava sərgisinin bir hissəsi kimi nümayiş olunacaq. Arxeoloqlar yeni kəşflərin davam edəcəyinə ümid edirlər.

Telegramda izləyin