Daimi yorğunluğun gizli səbəbləri: Nəyi bilmək vacibdir?

Bir çox insan özünü daim yorğun hiss edir və bunu yuxusuzluq, stres və işlərin çoxluğu ilə əlaqələndirir. Lakin bəzən bu yorğunluq ciddi sağlamlıq probleminin əlaməti ola bilər.

Oxu.Az-ın "İzvestiya"ya istinadla verdiyi məlumata görə, bu barədə tibb elmləri namizədi Lyubov Stankeviç danışıb.

Onun sözlərinə görə, əgər yorğunluq həftələrlə, hətta aylarla davam edirsə, insanın həyat tərzi normaldırsa, lakin yenə də o, yuxululuq, baş ağrıları, halsızlıq, diqqət dağınıqlığı, tez-tez əhval dəyişkənliyi və əsəbiliklə üzləşirsə, bu artıq sadə yorğunluq deyil, həkimə müraciət üçün ciddi siqnaldır.

Xroniki yorğunluğun səbəbləri nələr ola bilər?

Viruslar, xüsusilə Epşteyn-Barr, sitomeqalovirus və herpes virusları uzun müddət bədəndə gizli qala və immun sisteminə təsir edə bilər.

Genetik faktorlar, hüceyrələrdə enerji mübadiləsinin və sinir impulslarının ötürülməsinin pozulması da bu vəziyyətə səbəb ola bilər.

Doğru diaqnoz necə qoyulur?

Bu sindrom yalnız digər səbəblər istisna edildikdən sonra təsdiqlənə bilər. Yəni, əvvəlcə həkimlə birlikdə mərhələli şəkildə analizlər vermək lazımdır:

- Ümumi qan analizi və C-reaktiv zülal - iltihab göstəriciləri;

- TSH (tiroidstimullaşdırıcı hormon) - qalxanabənzər vəzinin fəaliyyəti;

- Ferritin - gizli dəmir çatışmazlığı;

- Qlükoza və qlükozalaşmış hemoqlobinə baxış - şəkər və maddələr mübadiləsi riski olanlar üçün vacibdir;

- Ümumi sidik analizi;

- COVID-19 və digər infeksiyalardan sonra - yüksək həssas troponin (ürək əzələsinin vəziyyəti üçün).

Əgər bu analizlərdə heç bir problem aşkarlanmasa, növbəti mərhələdə yoluxucu xəstəliklər istisna edilməlidir:

- HİV testi;

- Vərəmə qarşı yoxlanış.

Xroniki yorğunluq bəzən dəmir çatışmazlığı, avtoimmun xəstəliklər və ya hətta ürək-damar problemlərinin ilk əlaməti ola bilər. Əgər yorğunluq uzun müddət keçmirsə və səbəbi aydın deyilsə, mütləq həkimə müraciət edilməlidir.

Telegramda izləyin