"Ginnesin Rekordlar Kitabı"na düşüb: İngiltərədə KABUSLARLA dolu kəndin sirri

İngiltərənin illərlə dəhşət saçan Plakli adlı kəndi 70 ildən artıqdır ki, ölkənin ən qorxulu kəndi kimi tanınır. Onlarla paranormal hadisə, kabuslar və qorxunc əfsanələrlə yadda qalan bu kəndin sirri, nəhayət, bir tədqiqatçının səyi nəticəsində açılıb.

Oxu.Az bu barədə "Daily Mail"ə istinadla xəbər verir.

Bildirilir ki, Qərbi İngiltərə Universitetinin yaradıcı iqtisadiyyat üzrə dosenti, doktor Saymon Morton Plaklidəki sirli hadisələrin izini sübuta yetirilə bilən mənbələrdə axtarıb. O, yerli qəzet arxivlərini, doğum, ölüm və nikah sənədlərini, kilsə qeydlərini incələyərək əfsanələrin köklərinə enib.

Əfsanələrə görə, kənddə 10-dan çox kabus dolaşır - bunlar arasında özünü asan müəllim və palçıq karxanasında qışqıran kişi kimi qorxunc fiqurlar var.

Qorxulu şöhrətin tarixi

Plakli kəndi Kent qraflığında, Meidstoun və Eşford arasında yerləşir. Əslində, bu kənd qədim bir anglosakson yaşayış məskənidir və XIV əsrə aid kilsə də daxil olmaqla bir sıra tarixi tikililərə sahibdir. 1990-cı illərdə isə Plakli məşhur britaniyalı yazıçı Herberd Ernst Beytsin "May çiçəkləri" romanının televiziya adaptasiyası ilə daha da populyarlaşdı.

Amma onun ən böyük şöhrəti - qorxu dolu əhvalatlarla zəngin olmasıdır. 1950-ci ildə Plakli "ən çox ruh görünən yer" adına layiq görülüb və 1989-cu ildə bu status "Ginnesin Rekordlar Kitabı"nda da qeyd olunub.

Elmi maraqdan şəxsi araşdırmaya

Doktor Mortonun bu tədqiqata olan marağı yalnız elmi deyil, həm də şəxsi səbəblərə dayanır: onun mərhum atasının kökləri məhz Plakli kəndinə bağlıdır. Uşaq yaşlarından bu qorxunc əfsanələrlə maraqlanan Morton, nəticə etibarilə bir kəndin illərlə necə miflərlə yaşadığını üzə çıxarmağı bacarıb.

Plaklidəki kabusların izi: uydurma, yoxsa reallıq?

Lakin doktor Morton araşdırmasında bu əhvalatların əksəriyyətinin bir nəfərin - Plakli sakini Frederik Sandersin - təsəvvürünün məhsulu olduğunu müəyyən edib. Sanders özəl olaraq nəşr etdiyi kitablarında, qəzetlərə yazdığı məktublarda və ruh ovçuluğu məqalələrində bu hekayələri yayaraq kəndin qorxulu reputasiyasının əsasını qoyub.

Ən maraqlısı isə odur ki, bəzi əfsanələrin arxasında real faciələr dayanır:

- 1911-ci ildə Sara Şarp yanaraq həlak olub - o, "su kəvəri daşıyan qadın" kabusuna ilham verib.

- 1862-ci ildə Meri Enn Bennet intihar edib - kənd əfsanəsində "Ledi Rouz Kort" kimi qalıb.

- 1899-cu ildə Riçard Bridlend karxanada baş verən bədbəxt hadisə nəticəsində ölüb - bu isə "palçıq karxanasında qışqıran kişi" obrazının yaranmasına səbəb olub.

- 1919-cu ildə kağız istehsalçısı Henri Edqar Martin özünü asaraq intihar edib - əfsanələrdə "asılmış müəllim" kimi təsvir olunur.

Beləliklə, İngiltərənin "ən qorxunc" kəndi statusu, görünür ki, bir nəfərin uydurduğu əfsanələrin və bədbəxt təsadüflərin birləşməsindən ibarət imiş. Amma kəndin mistik havası hələ uzun illər insanları cəlb etməyə davam edəcək.

Telegramda izləyin