Alətləri tərəvəzdən olan orkestr Rekordlar Kitabına düşdü

Vyana kollektivi "The Vegetable Orchestra" ("Tərəvəz Orkestri") Ginnesin Rekordlar Kitabına düşüb.

Lent.az xarici mediaya istinadən xəbər verir ki, ansambl dünyada ən çox çıxış edən tərəvəz orkestri kimi tanınıb.

Karyeraları ərzində 344 konsert vermiş musiqiçilər yerkökü fleytası və soğan violonçeli kimi qeyri-adi alətlərdə melodiyalar ifa edərək sübut edirlər ki, incəsənətin sərhədi yoxdur.

Eksperimentdən dünya şöhrətinə

1998-ci ildə yaradılmış bu qrup klassikadan tutmuş elektron musiqiyə qədər müxtəlif janrların həvəskarlarını bir araya gətirib. Onların əsas məqsədi – adi ərzaq məhsullarının içində gizlənən akustik potensialı üzə çıxarmaqdır.
"Hər bir əşya özünəməxsus səs kainatını daşıyır", - ansamblın üzvləri bildirirlər.

Yaradıcı texnologiya

Hər konsertdən əvvəl alətlər yenidən hazırlanır. Bu iş üçün balqabaq, turp, kərəviz və digər tərəvəzlərdən istifadə olunur.

Konsert başa çatdıqdan sonra bu "alətlər" tamaşaçılar üçün şorbaya çevrilir.

"Tərəvəzlər tez formasını itirir, lakin bu bizim fəlsəfəmizin bir hissəsidir – incəsənət ötəridir, təbiət kimi", – musiqiçilər izah edirlər.

Təəccübləndirən səslər

Ansambl unikal səs mənzərələri yaradır – bəzən heyvan səslərini, bəzən isə abstrakt səsləri xatırladan kompozisiyalar.

Tərəvəzlərin forması və sıxlığı ilə eksperimentlər vasitəsilə əldə edilən effektləri adi musiqi alətlərində təkrar etmək mümkün deyil.

Telegramda izləyin