Mayda evlənənlər boşanır? - Ənənənin altından görün nə çıxdı...

Cəmiyyətimizdə may ayında toy etməyin uğursuz sayılması uzun illərdən bəri var. Bir çox insan bu ayda ailə qurmağı məqsədəuyğun hesab etmir. Bu fikir bəzən o qədər güclü təsir edir ki, insanlar bu səbəbdən həyatlarının ən önəmli günlərini təxirə salmaqdan belə çəkinmirlər.

Mövzu ilə bağlı Ölkə.az-a danışan astroloq Səbuhi Rəhimli bildirib ki, əslində, astroloji baxımdan hansısa ayın toy üçün uğursuz, ya uğurlu olması məsələsi yoxdur.

Onun sözlərinə görə, ailələrin artması baxımından toy yaxşı bir şeydir:

"Mən bu barədə araşdırma yazı da yazmışdım. Həkimlərdən də soruşdum. Bəziləri dedi "bir az allergik dövrdür", amma bunun ailə qurmaqla bir əlaqəsi yoxdur. Astroloji cəhətdən də may ayı baharın ən gözəl aydır. Xüsusən də oktyabr və may ayı Veneranın sevgi, gözəllik, izdivac planetinin himayəsi altındadır.

Bəs bunun kökü haradan gəlir? Folklorumuzda, etnoqrafik əsərlərdə belə bir şeyə rast gəlinməyib ki, may ayında toy olmaz. "May ayı, vay ayı" deyirlər. Nəyə görə? Filankəs may ayında evləndi, boşandı. Guya ayrı aylarda evlənənlər də boşanan olmur? Bu, absurd bir şeydir.

O vaxt Bakıda sovet dönəmində vəzifəli ermənilər çox idi. Onlar təşkilati işləri çox yaxşı bacarırdılar və aprelin 24-də soyqırımı gününü 40 gün matəm kimi qeyd edirdilər. O da may ayını bütövlükdə əhatə edirdi. Ona görə onların təbliğatı vasitələri ilə bunu təlqin eləmişdilər. Bu mövzuda saatlarla efirlərdə danışmışam. Elə bundan sonra şadlıq saraylarından zənglər gəlirdi və deyirdilər "Çox sağ olun, sizin dediklərinizdən sonra artıq may ayında əvvəllər 4-5 toy olurdu, indi isə xeyli artıb".

Artıq o ənənə yoxdur, ümumiyyətlə unutdurmaq lazımdır. Heç bir əsası yoxdur. Fikrimcə, artıq bu ənənə yox olmaq üzrədir".

Telegramda izləyin