Lələkli qayda pozucusu: İsveçrədə ördək iki dəfə sürət həddini aşdığı üçün "radara" düşüb

İsveçrənin Kenits kommunasında yol kamerası qeyri-adi bir yol hərəkəti qaydası pozuntusunu - sürət həddini aşan bir ördəyi qeydə alıb. Bu, ərazidə baş verən ilk belə hadisə deyil və həm yerli sakinlər, həm də səlahiyyətli şəxslər arasında xeyli təəccüb doğurub.

Oxu.Az xəbər verir ki, bu barədə "Berner Zeitung" nəşri məlumat yayıb.

Məlumata görə, qayda pozucusu olan ördəyin fotosu yerli hakimiyyət orqanları tərəfindən rəsmi şəkildə dərc edilib. Ördək 52 km/saat sürətlə uçub. Halbuki həmin ərazidə sürət həddi 30 km/saatdan artıq olmamalıdır. Beləliklə, o, icazə verilən limiti düz 22 km/saat keçib.

Bu hadisənin ən maraqlı tərəfi odur ki, məmurlar bunun təkrar oluna biləcəyini istisna etmirlər. Onların sözlərinə görə, eyni kameraya düz yeddi il əvvəl də oxşar bir quş düşmüş və o zaman da eyni sürətlə uçurmuş. Bu isə yerli ictimaiyyətdə "bu bir təsadüfdürmü, yoxsa bəzi ördəklər doğrudan da sürət həddini aşmağa meyillidir?" sualını doğurub.

"Polis müfəttişliyi əməkdaşlarımız 2025-ci il aprelin 13-nə aid görüntünü görəndə olduqca təəccübləndilər. Onlar dərhal yeddi il əvvəlki fotonu xatırladılar", - deyə icma nümayəndəsi Syuzanna Bandi bildirib.

Yerli sakinlər əvvəlcə fotoşəklin saxta olduğunu düşünüblər və səlahiyyətli şəxslərin açıqlamasını gecikmiş bir aprel zarafatı kimi qəbul ediblər. Lakin polis skeptikləri əmin edib ki, radar sistemində şəkillərlə manipulyasiya texniki cəhətdən mümkün deyil və bütün kameralar hər il İsveçrə Metrologiya İnstitutu tərəfindən ciddi yoxlamadan keçirilir.

Yerli polisin mətbuat katibinin sözlərinə görə, Vanqentalştrassda sürətə nəzarət kameralarının quraşdırıldığı ərazinin yaxınlığında bir neçə kiçik çay yerləşir və ördəklər bu məkanda özlərini evdəki kimi hiss edirlər.

"Əgər ördək sürücü olsaydı, ciddi şəkildə cərimələnəcəkdi. Hətta biz prokurorluğa ərizə təqdim etməli olardıq", - deyə Kenits Polis Müfəttişliyinin rəhbəri Sven Montqomeri bildirib.

Telegramda izləyin