42 gün vədi yalan imiş: Hamı sehrli çubuq axtarır, amma...

Dil öyrənmək uzun müddət vaxt tələb edən bir prosesdir. Lakin son illərdə dil öyrənmə platformalarının sayı sürətlə artır və bəziləri daha da irəli gedərək, cəmi 42 günə ingilis dilində danışmağı vəd edir. Yüzlərlə insan da bu məqsədlə həmin kurslara müraciət edirlər.

Maraqlıdır bu, doğrudanmı mümkündür, yoxsa sadəcə bir marketinq strategiyasıdır?

Mövzu ilə bağlı ingilis dili müəllimi Gulya Huseynzadənin fikirlərini öyrəndik. O, Ölkə.az-a açıqlamasında bildirdi ki, əgər məqsəd yalnız ən sadə ifadələri öyrənməkdirsə, mümkündür:

"Amma əgər məqsəd filmə altyazısız baxmaq, iş görüşməsində özünü rahat hiss etmək və ya xarici ölkələrə səyahət zamanı sərbəst ünsiyyət qurmaqdırsa, 42 gün kifayət etməz.

Dil öyrənmək qısa məsafə qaçışı deyil, uzun bir marafondur. Təcrübəmə əsaslanaraq deyə bilərəm ki, 42 gün ərzində sadəcə sözləri əzbərləyib, nəticədə zehni yüklənmə yaşamaq və sonrakı bir ay ərzində heç bir irəliləyiş etməmək halları daha tez-tez rast gəlinir.

"6-8 ay çalışmalısan" deyən reklama heç kim baxmır. Hamı sehrli çubuq axtarır. Amma reallıqda dil öyrənmək sehr deyil, səbir tələb edir.

Bu tip kursların çoxusu da 42 günlük nəticəni tələbənin dil səviyyəsi B1-B2 olandan sonra 42 günə daha da təkmilləşdirəcəyinə "zəmanət" verir. Yəni bu da 0-dan 42 günə danış demək deyil. Kimin üçünsə gündəlik 15 dəqiqə ilə 6 aya çatdığı yerə, başqası 1 ilə çatır. Amma ortalama danışıq səviyyəsinə gəlmək üçün, fikrini rahat ifadə etmək üçün davamlı çalışsan, 6-8 ay ingilis dilini öyrənməyə kifayət edir. Amma əgər hər gün 10 dəqiqə ayırıb, sonra 3 gün heç nə etmirsənsə, öyrənmə zamanın bir az da uzanır. Əlbəttəki, "başladım, yoruldum, qayıtdım" dövrləri də ola bilir və bunları da nəzərə almaq lazımdır".

Telegramda izləyin