Bu uşaqlar doğularkən uduzur - Psixoloqdan reaksiya

"Doğulduğun ev qədərindir" deyirlər. Amma biz nə doğulacağımız evi, nə də o evin içində bizi qarşılayacaq insanları seçə bilirik. Heç kim soruşmur bizdən: "Kimin övladı olmaq istəyərsən?"

Bəziləri doğulandan körpələr evinə verilir, bəziləri küçəyə atılır. Kimisi zorakılığın ortasında doğulur, kimisi də sevgi və şəfqət içində böyüyür. Amma ən acı həqiqətlərdən biri də bu dünyaya azyaşlı bir ananın övladı olaraq gəlməkdir.

Təkcə ötən ilin rəsmi statistikası göstərir ki, 1279 uşaq azyaşlı analar tərəfindən dünyaya gətirilib. Bu, sadəcə rəqəm deyil. Hər biri bir tale, bir həyat, bir uşaq deməkdir. Bu körpələr üçün həyat bəzən daha doğulmadan çətinliklərlə başlayır. Anası özü hələ uşaqkən, bir uşaq dünyaya gətirir. Hansı ki, o, buna nə fiziki, nə də psixoloji olaraq buna hazır deyil.

Bəs bu uşaqların həyatı necə keçir? Onlar da azyaşlı anaları kimi vaxtından əvvəl böyüməyə məcbur qalırmı? Həyatları da doğumları kimi "vaxtsız" olub keçib gedirmi?

Lent.az-a açıqlama verən tanınmış psixoloq Nizami Orucov qeyd edib ki, erkən nikahdan doğulan uşaqlarda davranış pozuntuları görülür:

"Psixoloq kimi təcrübəmdə bu cür hallara rast gəlmişəm və müşahidələrim nəticəsində onu deyə bilərəm ki, azyaşlı anadan doğulan uşaqlar çox zaman emosional qayğıdan, təhlükəsizlik hissindən və sağlam rol modelindən məhrum böyüyürlər. Ana özü hələ inkişaf mərhələsində olduğu üçün, övladına psixoloji dayaq ola bilməmək riski yüksəkdir. Bu da uşaqda özgüvən əksikliyi, davranış pozuntuları və dəyərsizlik hissinə səbəb ola bilər.

Bu, təkcə bir ailənin deyil, cəmiyyətin problemidir. Erkən nikah və analığın qarşısını almaq üçün maarifləndirmə, psixoloji dəstək və təhsilin rolu əvəzsizdir.

Unutmayaq ki, bir uşağın uşaqlığı əlindən alınanda, o, başqasının uşaqlığını da tam yaşada bilmir",-deyə N.Orucov vurğulayıb.

Telegramda izləyin