Torpaq sürüşməsi kəndi yer üzündən sildi - Yeni göl yaranır

İsveçrənin Alp dağlarında yerləşən Blatten kəndi demək olar ki, tamamilə məhv olub.

Qaynarinfo xəbər verir ki, hadisə ötən gün yerli vaxtla saat 15:30 radələrində baş verib. Baş verən irimiqyaslı torpaq sürüşməsi qarşısına çıxan hər şeyi silib-süpürüb. Kənd sakinləri əvvəlcədən təxliyə edildiyi üçün evlərdə insan olmayıb. Lakin bununla da fəlakət bitməyib - hazırda bölgədə daşqın təhlükəsi də yaranıb.

Valais kantonunun yerli hakimiyyət orqanlarının verdiyi məlumata görə, Lonza çayının yatağı torpaq sürüşməsi nəticəsində bağlanıb. Eyni zamanda başlayan intensiv yağışlar suyun səviyyəsinin daha da sürətlə qalxmasına səbəb olur.

"Yeni bir göl formalaşmağa başlayıb və bu göl getdikcə böyüyür. Qopan qar və daş kütləsi çayın qarşısını kəsərək təbii bənd formalaşdırıb. Lakin çay öz yolunu tapacaq və bu prosesi nəzarətdə saxlaya bilmirik", deyə geoloq Rafael Mayorats bildirib.

Rəsmilər dərhal İsveçrə ordusuna müraciət edərək nasos qurğularının quraşdırılmasında kömək istəyiblər. Əhali hakimiyyətin göstərişlərinə ciddi şəkildə əməl etməyə və təhlükəli əraziyə yaxınlaşmamağa çağırılır. Eyni zamanda, qonşu kəndlərin sakinləri də təxliyə olunub.

Telegramda izləyin