İlon Mask dünyanın ən böyük zavodunu inşa edir

ABŞ-nin "SpaceX" şirkətinin təsisçisi İlon Mask "Gigabay" adını verdiyi yeni istehsal kompleksinin inşasına başlandığını açıqlayıb.

Oxu.Az xəbər verir ki, bu barədə se7en.ws məlumat yayıb.

Milyarderin sözlərinə görə, bu obyekt tamamlandıqdan sonra Yerdəki ən böyük sənaye tikililərindən birinə çevriləcək və bəzi göstəricilər üzrə dünyanın ən böyük binası ola bilər.

"Bu, bizim "Gigabay" zavodumuzdur. Hələ tam hazır deyil, lakin tikinti prosesi sürətlə davam edir. Bura ildə min ədəd "Starship" raketi istehsal edəcək. Bu, bəlkə də dünyada analoqu olmayan bir müəssisə olacaq", - deyə biznesmen vurğulayıb.

Qeyd edək ki, "Starship" raketləri Aya missiyaların həyata keçirilməsi və Marsa ekspedisiyalar üçün nəzərdə tutulub. Yeni kompleks raketlərin çoxistifadəli versiyalarını - "Super Heavy" sürətləndiricisini və "Ship" adlı ikinci mərhələni - tam avtomatlaşdırılmış yığım xətləri vasitəsilə istehsal edəcək.

İstehsalı planlaşdırılan "Starship" raketləri 150 tona qədər faydalı yüklə Yer orbitinə qalxmaq imkanına malikdir. Bu göstərici hazırda istifadədə olan "Falcon 9" raketinin daşıma gücünü xeyli üstələyir. Hal-hazırda şirkət hər 2-3 həftədə bir "Starship" raketi istehsal edir. Yeni zavod fəaliyyətə başladıqdan sonra "SpaceX"in istehsal həcmi "Boeing" və "Airbus" kimi təyyarə nəhənglərinin illik istehsalına bərabər olacaq.

Yeni zavodun əsas məqsədi raket istehsalını sürətləndirərək kosmik missiyaların miqyasını genişləndirmək və Marsın kolonizasiya planlarını reallaşdırmaqdır.

Telegramda izləyin