İnsanlar süni intellektə "bağlanmağa" başlayırlar: Alimlər AI-yə qarşı hissləri araşdırdılar

Müasir dünyada süni intellekt (AI) hər yerdə yayılıb, insanların süni intellektlə qarşılıqlı əlaqəsi isə daha tez-tez baş verir və mürəkkəbləşir. Yaponiyanın Vaseda Universitetindən olan tədqiqatçılar insan və AI arasında münasibətləri bağlanma nəzəriyyəsi - insanların bir-biri ilə necə emosional bağlar qurduğunu ənənəvi şəkildə izah edən psixoloji model prizmasından nəzərdən keçirməyin mümkün olub-olmadığını öyrənmək qərarına gəliblər.

Oxu.Az-ın xəbərinə görə, bu barədə araşdırmanın nəticələri "Current Psychology" jurnalında dərc olunub.

Alimlər Fan Yanq və Atsuşi Oşionun rəhbərlik etdiyi bir qrup elm adamı xüsusi texnika - EHARS şkalasını işləyib hazırlayıb ki, bu şkala insanın süni intellektə emosional cəhətdən nə qədər "bağlandığını" ölçməyə imkan verir. Məlum olub ki, bir çox insanlar həqiqətən dəstək və məsləhət üçün süni intellektə müraciət edirlər: tədqiqat iştirakçılarının demək olar ki, 75 faizi süni intellektdən yardım mənbəyi kimi istifadə edib, təxminən 39 faizi isə onu etibarlı və daimi yoldaş kimi qəbul edib.

Eyni zamanda, süni intellektə qarşı iki növ münasibət müəyyən edilib: narahat - insan səhv cavab almaqdan qorxur və dəstəyə ehtiyac duyur, çəkingən - insan süni intellektə yaxın olmaqdan narahatlıq keçirir və məsafə saxlamağa üstünlük verir.

Alimlər vurğulayırlar ki, onların işi insanların AI-ni emosional səviyyədə necə qəbul etdiyini anlamağa kömək edir. Bu biliklər daha etik və psixoloji cəhətdən uyğunlaşdırılmış süni intellekt sistemlərinin yaradılması üçün vacibdir, məsələn, tənha insanları dəstəkləmək üçün çatbotlar və ya psixoterapiya tətbiqləri. Bu cür sistemlər istifadəçilərin fərdi ehtiyaclarını daha yaxşı nəzərə almağa - narahat insanlara qarşı daha həssas olmağa imkan verəcək.

"Süni intellekt həyatımıza daha dərindən nüfuz etdikcə, insanlar onda təkcə məlumat deyil, həm də emosional dəstək axtarmağa başlayacaqlar. Bizim araşdırma bunun necə baş verdiyini anlamağa və istifadəçilərin psixoloji rifahını nəzərə alan texnologiyalar yaratmağa kömək edir", - deyə Fan Yanq bildirib.

Telegramda izləyin