İnsanların boyu ilə paxıllıq arasında əlaqə tapıldı - Belə şəxslər daha qısqanc olur

Boyundan narazı olan insanlar, xüsusən də öz cinsinin nümayəndələrinə qarşı paxıllıq, qısqanclıq və rəqabət qabiliyyətini daha çox nümayiş etdirirlər. Qərbi Sidney Universitetinin psixoloqları belə nəticəyə gəliblər.

BAKU.WS xarici mətbuata istinadən xəbər verir ki, onların araşdırmasının nəticələri Evolutionary Behavioral Sciences (EBS) jurnalında dərc olunub.

Məlumata görə, eksperimentdə ABŞ-nin 302 nəfər yaşlı sakini iştirak edib. İştirakçıların həqiqi boyu ölçülüb və ondan narazılıq səviyyəsi qiymətləndirilib, bundan sonra bu məlumatlar həmcinslərlə qarşılıqlı əlaqədə rəqabət, paxıllıq və qısqanclıq davranışı üzrə testlərin nəticələri ilə müqayisə edilib.

Məlum olub ki, boyu ilə arzuladığı boy arasındakı fərqə xüsusilə həssas olanlar rəqabətədavamlı olurlar. Bu əlaqə xüsusilə kişilərdə özünü göstərir: boylarından narazı olanlar daha uğurlu həmyaşıdlarına hirslənir və cəlbedici rəqiblərə qarşı paxıllıq hissi keçirirlər. Qadın subyektlər də yüksək səviyyəli "paxıllıq" nümayiş etdirdilər, lakin onların rəqabət qabiliyyəti daha çox hündür olmaq üçün daxili istəkləri ilə bağlı olur.

Tədqiqatın müəllifləri vurğuladılar ki, paxıllıq və qısqanclıq obyektiv fiziki xüsusiyyətlərlə deyil, subyektiv mənfi özünü qavrayışla əlaqələndirilir. Onların fikrincə, görünüşün mədəni standartlarına uyğunlaşma istəyi romantik münasibətlərdə, işdə və gündəlik həyatda narahatlıq yarada və davranışa təsir göstərə bilər.

Telegramda izləyin