Trampın teatr gecəsi etirazlarla kölgələndi

ABŞ Prezidenti Donald Tramp həyat yoldaşı Melaniya Trampla birlikdə Vaşinqtondakı məşhur Kennedi Mərkəzində nümayiş olunan Les Misérables (Səfillər) musiqili tamaşasına qatılıb.

Sonxeber.az xarici mediaya istinadən xəbər verir ki, lakin Trampın tədbirdə iştirak edəcəyini öyrənən bəzi aktyorlar səhnəyə çıxmaqdan imtina edərək diqqətçəkən bir etiraz aksiyasına imza atıblar.

Prezident Trampın sevdiyi musiqillərdən biri olan Les Misérablesin açılış gecəsində iştirak etməsi, bir sıra sənətçilər tərəfindən narazılıqla qarşılanıb. Aktyorlar, Trampın siyasətini, xüsusilə də mədəniyyət və incəsənət sahələrinə müdaxilələrini etirazla qarşılayaraq tədbirdə yer almayacaqlarını açıqlayıblar.

Lakin Tramp bu etirazlara əhəmiyyət vermədiyini bildirib. Zərif qara smokinqdə salona daxil olan prezident, jurnalistlərə verdiyi qısa açıqlamada, "Heç vecimə deyil. Mən yalnız ölkəni yaxşı idarə etməyə fokuslanmışam," – deyə bildirib. Melaniya Tramp isə gecəyə qolsuz, zərif, qara paltarı və gümüş rəngli hündürdaban ayaqqabıları ilə qatılıb.

Xatırladaq ki, Tramp fevral ayında Kennedi Mərkəzinin rəhbərliyinə özünü təyin etmiş, mərkəzin "pis vəziyyətdə" olduğunu deyərək genişmiqyaslı bərpa işləri vəd etmişdi. Bu tədbir həmin təyinatdan sonra mərkəzə etdiyi ilk rəsmi səfər olub.

Prezidentin mədəniyyət sahəsində həyata keçirdiyi dəyişikliklər də mübahisələrə səbəb olub. Xüsusilə, əvvəlki rəhbərliyi vəzifədən kənarlaşdıraraq, öz təyin etdiyi yeni komanda vasitəsilə mərkəzi yenidən formalaşdırması sənət camiəsində kəskin tənqidlərə yol açıb. Tramp, əvvəlki rəhbərliyin gəncləri hədəf alan "drag şoularına" icazə verdiyini iddia etmişdi.

Trampın mədəniyyət siyasətinə qarşı çıxan təkcə aktyorlar olmayıb. Açılış gecəsinə bəziləri "drag" sənətçisi olan tamaşaçılar da qatılaraq etirazlarını davam etdiriblər. Sosial mediada yayılan görüntülərdə, bu sənətçilərin salona daxil olarkən bəzi izləyicilər tərəfindən alqışlandığı görünür.

Təntənəli gecədə ümumilikdə 10 milyon dollar ianə toplanıb. Tədbirdə ABŞ vitse-prezidenti Cey Di Vens və həyat yoldaşı Uşa Vens də iştirak ediblər.

Telegramda izləyin