Kamilla Diananın adına hazırlanan çantada - "Bu, xəyanətdir"

İngiltərənin Askot şəhərində keçirilən illik at yarışlarının dördüncü günündə kraliça Kamilla britaniyalı dizayner Anna Valentineyə məxsus ağ libas geyinib.

Axşam.az xəbər verir ki, o, görünüşünü mərhum kraliça II Elizavetaya məxsus "Raspberry Pip" broşu və Filip Treysiyə məxsus tüklü şlyapa ilə tamamlayıb. Amma ictimaiyyətin diqqətini çəkən əsas aksesuar — Kamillanın əlində tutduğu açıq rəngli "Lady Dior" çantası olub.

"Dior"un rəsmi saytında bu çanta haqqında qeyd olunur: "Məşhur "Lady Dior" çantası hər zaman Uels şahzadəsi, Ledi Diana ilə bağlı olacaq. 1995-ci ilin sentyabrında Parisdə Böyük Sarayda Pol Sezan retrospektivinin açılışında Fransanın birinci xanımı Bernadet Şirak ona hələ rəsmi olaraq satışa çıxarılmamış və o vaxtlar ‘Chouchou’ adlanan "Dior" çantasını hədiyyə edib.

Bu çanta qısa müddətdə Diananın imzasına çevrilib: o, müxtəlif rəng və ölçülərdə sifariş verir, həm rəsmi tədbirlərdə, həm də gündəlik çıxışlarında istifadə edirdi. 1996-cı ildə "Dior" bu modeli rəsmən "Lady Dior" adlandırıb.

Kral III Çarlz, Diana və Kamilla arasında olan mürəkkəb münasibətlər fonunda Kamillanın bu çantanı seçməsi sosial şəbəkələrdə birmənalı qarşılanmayıb. Bəzi istifadəçilər bunu "uyğunsuz" və "hörmətsizlik" adlandırıblar.

"The Crown" adlı teleqram kanalında yazılıb: "Yaxşı, nə olar, Kamilla Çarlzı əlindən aldı — keçdi, getdi. Amma "Lady Dior"un ürəklərin kraliçasının adını daşıyan çantası ilə görünmək xəyanətin zirvəsidir".

Xatırladaq ki, şahzadə Çarlz (indiki kral III Çarlz) və Diana Spenser 1981-ci ildə evləniblər. Onların iki oğlu olub — Uilyam və Harri. Lakin Çarlzın Kamilla Parker-Boulz ilə davam edən münasibətləri onların nikahını gərginləşdirib. 1992-ci ildə ayrı yaşamağa başlayıblar, 1996-cı ildə isə rəsmi olaraq boşanıblar. Bir il sonra, 1997-ci ildə, Diana Parisdə avtomobil qəzasında vəfat edib.

Kamilla isə o vaxta qədər Endryu Parker-Boulz ilə evli olub. O, Çarlzla 2005-ci ildə Vindsorda bələdiyyə binasında keçirilən mülki nikah mərasimi ilə evlənib.

Telegramda izləyin