Fransada hərbçilər 16-cı əsrdə batan gəmini tapdılar

Aralıq dənizində Fransa sahillərində XVI əsrdə batmış ticarət gəmisinin qalıqları tapılıb.

Oxu.Az-ın xəbərinə görə, bu barədə "Smithsonian Magazine" nəşri məlumat verib.

Məlumata görə, gəmi Fransa Hərbi Dəniz Qüvvələrinin keçirdiyi dərin dəniz əməliyyatı zamanı təsadüfən aşkar edilib.

Gəmi qəzası Ramatyuel şəhəri yaxınlığında, lacivərd sahillərin Sen-Trope ərazisində baş verib. Hidrolokator dənizin dibində böyük bir obyekt göstərib. Bundan sonra suya kamera endirilib və cihaz qədim gəminin konturunu qeydə alıb. Ekspertlərin məlumatına görə, dərinlikdə tapılan ticarət gəmisi olub. Uzunluğu 30 m, eni isə 7 m-ə çatıb. Gəmi 2.6 min m dərinlikdə tapılıb ki, bu, Fransa sahillərində bütün gəmi qəzaları arasında ən böyük dərinlikdir.

Gəmidə keramika qablar və metal çubuqlar tapılıb. Dağıntılar arasında iki qazan, altı top və lövbər aşkarlanıb. Arxeoloqlar yükün yaxşı qorunduğunu qeyd ediblər. Lakin gəminin batmasının səbəbi sirr olaraq qalır. Mütəxəssislər hesab edirlər ki, gəmi batmış ola bilərdi, lakin buna nəyin səbəb olduğu hələlik məlum deyil.

Telegramda izləyin