Türkiyədə virus səbəbilə bütün heyvan bazarları bağlandı

Türkiyədə dabaq xəstəliyinin yayılması ilə əlaqədar bütün heyvandarlıq bazarlarının bağlanmasına qərar verilib.

Qaynarinfo xəbər verir ki, bu barədə IHA informasiya agentliyi məlumat yayıb.

Ölkənin kənd təsərrüfatı və meşə təsərrüfatı nazirliyi nəzdində fəaliyyət göstərən Qida Nəzarəti Baş İdarəsi 81 vilayətin yerli qurumlarına təcili xəbərdarlıq məktubu göndərib. Bildirilir ki, Qurban bayramından sonra xəstəliyin yayılmasında ciddi artım müşahidə olunur.

Dabaq virusuna yoluxma halları qeydə alınan bölgələrdə karantin tədbirləri tətbiq olunub. Qurumdan bildirilib ki, qısa müddətdə bütün heyvanların bu virusa qarşı peyvənd olunması mümkün deyil.

"Heyvanların və ziyarətçilərin intensiv hərəkətliliyi xəstəliyin yayılması baxımından yüksək risk daşıdığı üçün vilayətinizdə fəaliyyət göstərən bütün ticarət nöqtələrinin dərhal və növbəti göstərişədək bağlanmasını rica edirik", deyə baş idarənin təlimatında vurğulanıb.

Telegramda izləyin