Qədim Misir kahininin üzü müasir texnologiya ilə canlandırılıb

Misirin Karnak məbədində baş kahin kimi xidmət etmiş Merisamon adlı qadının üzü ilk dəfə müasir texnologiyalarla canlandırılıb.

Oxu.Az bu barədə "Daily Mail"ə istinadla xəbər verir.

Bildirilir ki, qadın kahinin əsas vəzifəsi tanrı Amon-Ra sakitləşdirmək üçün mahnılar oxumaq olub.

Ekspertlərin sözlərinə görə, 1920-ci ildə amerikalı arxeoloq Henri Brested tərəfindən tapılan mumiya toxunulmamış qalıb. Alimlər kompüter tomoqrafiyası vasitəsilə bədənin içini araşdırıb, üz formasını rəqəmsal şəkildə bərpa ediblər.

Bərpa zamanı anatomik deformasiya texnikası ilə mumiyanın kəllə quruluşuna uyğun üz forması yaradılıb. Daha sonra ona saç, göz, dəri rəngi və tekstura əlavə edilib. Merisamonun 30 yaşında, ehtimal ki, sağlam vəziyyətdə dünyasını dəyişdiyi məlum olub.

Sarkofaqdakı yazılar və bəzəklər onun yüksək təbəqəyə aid olduğunu göstərir. "Amon onu sevir" mənasını verən adı da bu statusu təsdiqləyir.

"Onun üzü sakit, ləyaqətli və mülayim idi. Bu, onun dini və sosial roluna uyğundur", - deyə alimlər bildiriblər.

Telegramda izləyin