Təzə pomidorları soyuducuda saxlamayın: ən yaxşı yer haradır?

Əgər siz də müşahidə etmisinizsə, soyuducuda bir-iki gün saxlanılan pomidorlar sulu, dad və qoxusuz olur.

Lent.az xarici mətbuata istinadla bildirir ki, bunun səbəbi yanlış saxlanma üsuludur.

Pomidorlar özünəməxsus şirin-turş və mürəkkəb dadını 400-dən çox uçucu birləşmənin iştirakı ilə qazanır. Bu maddələr isə yalnız müəyyən temperaturda aktiv olan fermentlər tərəfindən yaradılır.

Temperatur +12°C-dən aşağı düşəndə, bu fermentlərin fəaliyyəti dayanır. Nəticədə, pomidorun dadı kəskin şəkildə pisləşir. Ən pisi isə odur ki, bu proses geri dönməzdir, yəni pomidoru soyuducudan çıxarıb otaq temperaturunda saxlasanız belə, əvvəlki dadını qaytara bilməyəcəksiniz.

Bundan əlavə, soyuq temperatur pomidorun hüceyrə quruluşunu da pozur. Onun içi unlu, sulu və dadsız hala gəlir.

Pomidorları necə düzgün saxlamaq olar?

Otaq temperaturunda saxlayın

Pomidorları mətbəx masasının üzərində və ya pəncərə kənarında saxlamaq məsləhətdir. Yeganə şərt: birbaşa günəş şüaları düşməməlidir.

Nəfəs almasına icazə verin

Pomidorları sıx bağlı polietilen torbada saxlamaq olmaz. Bu, içəridə istixana effekti yaradacaq və çürümə prosesini sürətləndirəcək.

"Sap hissəsi" aşağıya baxsın

Pomidorun "quyruq" hissəsini aşağıya yönəldin. Bu, nəmin buxarlanmasının qarşısını alacaq və sap yerindən hava keçməyəcəyi üçün tez xarab olmayacaq.

İstisna: Əgər pomidorlar artıq tam yetişibsə və siz onları həmin gün yeməyi düşünmürsünüzsə, o zaman qısa müddətli saxlama üçün soyuducuya qoymaq olar, amma bu dad itkisinə səbəb olacaq.

Telegramda izləyin