Günvurma 7 nəfərin həyatına son qoydu

Cənubi Koreyada yayı müşayiət edən kəskin istilər artıq faciəvi nəticələrə səbəb olub.

Sonxeber.az xəbər verir ki, ölkədə may ayının ortasından bu yana günvurma ilə əlaqədar olaraq xəstəxanalara müraciət edən 1228 nəfərdən 7-si həyatını itirib.

Bu barədə məlumatı Cənubi Koreya Xəstəliklərə Nəzarət və Profilaktika Agentliyi (KDCA) yayıb. Bildirilib ki, 15 may tarixindən etibarən ölkə üzrə minlərlə insan günvurmadan əziyyət çəkib. Yalnız dünən ölkənin müxtəlif bölgələrində 238 nəfər günvurma diaqnozu ilə təcili yardım xidmətlərinə müraciət edib.

Rəsmi statistikaya görə, ötən ilin eyni dövrü ilə müqayisədə ölüm hallarında artım qeydə alınıb – 2023-cü ilin analoji dövründə günvurma nəticəsində 3 nəfər ölmüşdü.

Cənubi Koreya bu günlərdə iqlim dəyişikliyinin təsiri ilə baş verən ekstremal hava şəraiti ilə mübarizə aparır. Paytaxt Seulda dünən termometrlər 37,7 dərəcə istilik göstərib və bu, 1908-ci ildən bəri iyul ayının əvvəlində qeydə alınan ən yüksək temperatur olub.

Agentliyin əvvəlki illərlə bağlı statistik məlumatına görə, 2011–2024-cü illər arasında Cənubi Koreyada ümumilikdə 238 nəfər günvurma səbəbindən həyatını itirib.

Telegramda izləyin