Tramp amerikalı media maqnatı Merdoku məhkəməyə verib

ABŞ Prezidenti Donald Tramp media maqnatı Rupert Merdoku böhtan atmaqda ittiham edərək məhkəməyə verib.

Oxu.Az TASS-a istinadən xəbər verir ki, bu barədə Florida ştatının Cənub Dairəsi üzrə məhkəmənin elektron məlumat bazasında məlumat yer alıb

Məlumata görə, Merdoka aid olan "The Wall Street Journal" qəzetində Trampın amerikalı maliyyəçi Cefri Epşteynə yazdığı məktub haqqında məqalə dərc olunub.

Nəşr qeyd edib ki, Tramp maliyyəçinin yubileyinə hədiyyə olaraq əllə çəkilmiş çılpaq qadın şəkli göndərib.

ABŞ prezidenti qəzetin rəsmlə bağlı məlumatının yalan olduğunu bildirib.

Qeyd edək ki, Cefri Epşteyn 6 iyul 2019-cu ildə Nyu-York ştatının hüquq-mühafizə orqanları tərəfindən saxlanılıb. O, ən kiçiyi 14 yaşında olan onlarla azyaşlı qızın iştirakı ilə intim toplantılar təşkil etməkdə təqsirləndirilib. Maliyyəçinin cinayət təqibi onun 2019-cu il avqustun 10-da həbsxana kamerasında intihar etməsindən sonra dayandırılıb.

Telegramda izləyin